Степановтар династияларыттан бириэмийэ — 27 мая 2026 г. в 10:56:55.006
Степановтар династияларыттан бириэмийэ Биһиги, “Удьуор учуутал Степановтар” династиялара, 2016 сылтан төрөөбүт Саһылбыт нэһилиэгин үөрэммит оскуолабыт “Тиһэх чуораан” тэрээһинигэр үөрэх сылын устата научнай-практическай конференцияҕа ситиһиилээхтик кыттыбыт үөрэнээччигэ анал бириэмийэ туттарабыт. Билигин республика араас оройуоннарыгар, Дьокуускай куорат оскуолаларыгар уонча эдэр көлүөнэ учууталларбыт үлэлии сылдьаллар. Династиябытын Аллараа Бэстээх 2-с нүөмэрдээх политехнологическай хайысхалаах орто оскуола директора, РФ үөрэхтээһинин Бочуоттаах үлэһитэ, СӨ үөрэҕин туйгуна Ольга Васильевна Колмакова салайар. Номинациябытын бэлэмнииргэ Алексей Гаврильевич сылын аайы анал грамота оҥорон бэлэмниир. Е. Е. Протопопов аатынан Саһыл орто оскуолатыгар саха тылын уонна литературатын учууталынан ситиһиилээхтик үлэлии сылдьар сиэн балтыбыт Ньургуйаана Федоровна Булдакова үөрүүлээх быһыыга-майгыга онус кылаас үөрэнээччитигэр Владислав Пугачевка туттарда. Владислав быйылгы үөрэх сылыгар “Роль Ньалыас Уйбаана-Ивана Алексеевича Степанова в миссии А. Е. Кулаковского" дакылаатынан өрөспүүбүлүкэтээҕи, аан дойдутааҕы научнай-практическай конференцияларга призер, кыайыылаах аатын ылла. Бириэмийэбит кээмэйэ биэс тыһыынча солкуобай. Быйыл эдэр көлүөнэ учууталларбыт уонна ветераннарбыт кытыннылар. Александра Степанова, бэтэрээн учуутал. Дьокуускай куорат