«Уол Хаан» бырайыак — кэнчээри ыччат тирэҕэ. — 18 июля 2026 г. в 05:51:06.201
«Уол Хаан» бырайыак — кэнчээри ыччат тирэҕэ. Төрүт устуоруйаны уонна культураны билии — кэнчээри ыччат сайдыытыгар саамай сүрүн тирэх буолар. Ити сыалтан бэс ыйын саҥатыгар Ефим Егорович Протопопов аатынан Саһыл орто оскуолатын иһинэн үлэлиир «Кэскил» лааҕырыгар улахан уларытыы киирдэ. Оскуола дириэктэрэ Зинаида Пугачева уонна дириэктэри иитэр үлэҕэ солбуйааччы Сардана Сидорова бэйэлэрин «Уол Хаан» ааптарскай программаларын олоххо киллэрдилэр. Бу ураты программанан сайыҥҥы сынньалаҥнарын устуоруйаны дириҥэтэн үөрэтиигэ анаабыт 15 уолан ыччат дьоһуннаах устуоруйа-география маршрутунан айаннаатылар. Кинилэр Таатта уонна Чурапчы улуустарын устуоруйаны сырдатар музейдарынан сылдьан билиилэрин-көрүүлэрин кэҥэттилэр. Айан суолугар оҕолор Федеральнай трасса кытыытыгар, Кыйы сиригэр турар саха литературатын төрүттээччи А.Е. Кулаковскай — Өксөкүлээх Өлөксөй пааматынньыгар тохтоон аастылар. Өксөкүлээх Өлөксөй Саһыл нэһилиэгин кытта ыкса сибээстээх буолан, бу пааматынньыкка тохтоон ааһыы уолаттарга ураты хайысхалаах үөрэтии, улуу киһибит олоҕун чахчыларын харахтарынан көрөн билии буолла. Оҕолору Кыйы олохтооҕо, кыраайы үөрэтээччи , алгысчыт Сергей Федорович Кладкин ураты иһирэхтик көрүстэ. Кини оҕолорго анаан сиэри-туому тутуһан, ис сүрэҕиттэн алгыс тылларын анаата. Алгыс кэнниттэн Сергей Федорович бу пааматынньык туруоруллубут устуоруйатын, Өксөкүлээх Өлөксөй олорон ааспыт олоҕун уонна кини сырдык өйө-санаата саха норуотугар төһөлөөх улахан суолталааҕын туһунан сиһилии уонна чаҕылхайдык кэпсээтэ. Оҕолор устуоруйа чахчыларын улахан интэриэһинэн, чуумпуран туран иһиттилэр. Музейдары кэрийэр экспедиция лааҕыр оҕолоругар устуоруйаны кинигэттэн эрэ буолбакка, харахтарынан көрөн, ытык сирдэргэ сылдьан үөрэтэргэ улахан кыаҕы биэрдэ. Саҥа хайысхалаах авторскай бырайыак оҕолорго айылҕалыын, устуоруйалыын уонна төрүт культуралыын көрсүһүүнү, элбэх саҥа билиини бэлэхтээтэ. Бу курдук иитии үлэтэ «Уол Хаан» программа иитиллээччилэригэр дойдуларыгар тапталы, хорсун санааны уонна ытыктабылы үөскэтэргэ улахан тирэх буолара саарбахтаммат. Бу экспедиция кэрийбит музейдарын туһунан информацияны салгыы сырдатыахпыт. Биһигини кытта бииргэ буолуҥ, күндү ааҕааччыларбыт!