"САХА СИРЭ ЧЭЧИРИИ, САЙДА ТУРДУН!"
"САХА СИРЭ ЧЭЧИРИИ, САЙДА ТУРДУН!" ⚜️ Муус устар 27 күнэ — Саха Өрөспүүбүлүкэтин күнэ! Бу күн саха норуотугар ураты суолталаах, төрөөбүт өрөспүүбүлүкэбит сайдыытыгар уонна кэскилигэр бэриниилээх буоларбытын бигэргэтэр кэрэ бэлиэ күн. Үөрүүлээх линейка Саха Сирин былааҕын таһаарыытынан уонна Өрөспүүбүлүкэ гииминэн саҕаланна. Нэһилиэкпит аҕа баһылыга Алексей Васильевич эҕэрдэ тылын эттэ уонна 14 саастарын туолбут үөрэнээччилэргэ паспорт хаҕын, өйдөбүнньүк бэлиэ-значогу үөрүүлээх быһыыга-майгыга туттарда. Бу күн ураты суолтатын туһунан оскуолабыт учуутала Саргылана Аркадьевна киэҥник сырдатта. Саха норуодунай поэтессата Наталья Харлампьева "Мин саха буоламмын" диэн хоһоонун 5-с кылаас уолаттара ааҕан, дьон-сэргэ сүргэтин көтөхтүлэр. Бу үөрүүлээх күн бэтэрээн учууталбыт Анастасия Николаевна уонна педагог-библиотекарь Христина Егоровна оҕолорго сахалыы остуол оонньууларын тэрийдилэр. Үөрэнээччилэр бары астына оонньоон, сахалыы остуол оонньуута эриэккэһин, умсугутуулааҕын, киһини кэрэхсэтэрин өссө төгүл биллилэр. Ыҥырыылаах ыалдьыттар Гаврил Иванович уонна Светлана Яковлевна үөрэнээччилэргэ туһалаах сүбэлэрин биэрэн, маастар-кылаас көрдөрдүлэр. Тэрээһин түмүгэр оҕолорго туоһу суруктары туттардылар.