Елена Михайлова - "Сыл бастыҥ иитээччитэ-2026" күрэс Лауреата — 11 июня 2026 г. в 12:25:39.786
Елена Михайлова - "Сыл бастыҥ иитээччитэ-2026" күрэс Лауреата Бэс ыйын 8-11 күннэригэр өрөспүүбүлүкэтээҕи "Сыл бастыҥ иитээччитэ – 2026" күрэс Дьокуускай куоракка буолан ааста. Амма улууһун чиэһин "Хатыҥчаана" уһуйаан иитээччитэ Михайлова Елена көмүскээтэ. Ол курдук, иитээччилэр бастакы күн оҕолору кытта дьарык, оҕо иитиитигэр төрөппүттэри сырдатар тургутуулары аастылар. Бу тургутуулар түмүктэринэн ордук интэриэһинэй ньымалардаах 15 иитээччи Лауреат үрдүк аатын ыллылар. Иккис күн лауреаттар маастар-кылаас ыыттылар уонна бүгүҥҥү күн иитээччини долгутар сытыы ыйытыктардаах брифиҥҥэ кытыннылар. Бүтэһик күҥҥэ күрэс түмүктүүр түһүмэҕэр 5 иитээччи тахсан, блицтурнирга илин-кэлин түсүһэн кииристилэр. Елена бастакы күн бэйэтин бөлөҕөр бастыҥ буолан, иккис күн маастар-кылааһын эмиэ бэрт чаҕылхайдык ыытта, элбэх иитээччи, эксперт сэҥээриитин ылыан ылла. Бүгүн Елена Михайлова Саха НКИХ "Саҥа күн" биэриитигэр интервью биэрдэ. Бэс ыйын 11 күнүгэр сарсыардаттан Орджоникидзе болуоссатыгар уһуйааннар быыстапкалара, оҕо аймах кэнсиэрэ уонна "Сыл бастыҥ иитээччитэ -2026" күрэс үөрүүлээх сабыллыыта буолла. Манна Амма улууһун "Дуораанчык" уонна "Радуга" уһуйааннара бэйэлэрин уопуттарын көрдөрө-билиһиннэрэ быыстапкаларын, үлэлэрин-хамнастарын, уопуттарын кэпсээтилэр. Бу күрэс дьүүллүүр сүбэтигэр экспиэрт быһыытынан хаһыс да сылларын улуустааҕы үөрэх салалтатын испэсэлииһэ Эмма Давыдова уонна Бүтүн Арассыыйатааҕы "Сыл бастыҥ төрүт тыл учуутала" күрэх Лауреата Рустам Седых үлэлээтилэр. Елена Михайлованы өйүүр хамаанда "Хатыҥчаана" уһуйаантан сэбиэдиссэйи иитэр-үөрэтэр үлэҕэ солбуйааччы, Мария Неустроева салайааччылаах бэрт таһаарыылаахтык, сэргэхтик сырыттылар. Мария Петровна кэккэ сылларга субуруччу өрөспүүбүлүкэ таһымыгар Айталина Игнатьеваны, Инна Нестерованы, Рустам Седыҕы, Елена Михайлованы иитэн, чочуйан, үрдүк таһымҥа таһаарда. Манна даҕатан эттэххэ, күрэс ыалдьытынан "Обруч" (Образование. Ребенок. Ученик) сурунаал эрэдээктэрэ, кыра саастаах оҕолорго экологическай иитии бырагыраама автора Наталья Рыжова буолла. Бу бырагырааманан 30-ттан тахса сыл "Дуораанчык" уһуйаан үлэлээн кэллэ. Авторы уһуйаан иитэээчилэрэ илэ бэйэтин көрсөн, үлэ уопутун кэпсээн, санаа атастастылар. Наталья Рыжова "Обруч" журнал редакциятыттан махтал суругун Галина Мартыноваҕа үөрүүлээх быһыыга-майгыга туттарда. Күрэс түмүгүнэн, муҥуутуур кыайыылааҕынан, Нам улууһун иитээччитэ Анастасия Григорьева таҕыста. Оттон төрүт тыл учууталларын Бүтүн Арассыыйатааҕы күрэһигэр кыттар быраабы Сунтаар иитээччитэ Туйаара Васильева ылла. Биһиги улууспут чиэһин чаҕылхайдык ааттаппыт иитээччибитин, Елена Михайлованы Лауреат үрдүк аатын ылбытынан, өрөспүүбүлүкэҕэ саҥа сулус буолан сандаарбытынан киэн тутта эҕэрдэлиибит!