26–27 март көннәрендә мәктәбебез базасында белем бирү оешмаларының һәм якшәмбе мәктәпл... — 30 марта 2026 г. в 10:46:54.915
26–27 март көннәрендә мәктәбебез базасында белем бирү оешмаларының һәм якшәмбе мәктәпләренең туган телләр укытучылары бөтенроссия конкурсының йомгаклау этабы үтте. Конкурсның максаты – Россия Федерациясе һәм Татарстан Республикасы халыкларының тел һәм мәдәни күп төрлелеген саклап калуга һәм үстерүгә ярдәм итү, туган телләр укытучыларының статусын күтәрү, аларның педагогик тәҗрибәсен тарату. Бәйге мәктәбебез укучылары әзерләгән бик матур концерт чарасы белән ачылып китте. Катнашучыларны ТР мәгариф һәм фән министры урынбасары Минзәлия Закирова сәламләде. Аларга алдагы сынауларда уңышлар теләде. Ике көн дәвамында педагоглар һөнәри осталыкта ярышты: остаханәләр үткәрде, проектлар тәкъдим итте һәм түгәрәк өстәл кысаларында туган телләрне өйрәнүгә кызыксыну тудыру, Россия халыкларының мәдәниятен һәм гореф-гадәтләрен саклау мәсьәләләре буенча фикер алыштылар. Әлеге бәйгенең катнашу географиясе бик киң – Татарстан, Чувашия, Башкортстан, Мордовия республикалары, Киров, Төмән, Ульяновск, Оренбург өлкәләре, Пермь крае. Һәр катнашучы лаеклы чыгыш ясады. Бәйге тәмамлангач, кунакларны К.Насыйрига багышланган «Интерактив музей: җанлы мирас музей лабораториясе» белән таныштырдык. Кунаклар мәктәбебезне бик ошатып, рәхмәт сүзләре әйтеп киттеләр.