СФСР уонна Саха АССР үтүөлээх учуутала, “Үлэ кыһыл знамята” орден кавалера Михаил Никол...
СФСР уонна Саха АССР үтүөлээх учуутала, “Үлэ кыһыл знамята” орден кавалера Михаил Николаевич Анисимов төрөөбүт күнүн көрсө, улуу учуутал аатын үйэтитэр, олорон ааспыт олоҕун үүнэр көлүөнэҕэ сырдатар сыаллаах кылаас чаастара ыытылыннылар. Михаил Николаевич Анисимов туһунан кэпсии түһэр эбит буоллахха Сунтаар улууһун Түбэй нэһилиэгэр 1893 сыллаахха төрөөбүтэ. Михаил 1901 сыллаахха Сиэйэҕэ таҥара дьиэтин иһинэн тэриллибит оскуолаҕа үөрэнэ киирбит. Сиэйэҕэ биир сыл үөрэнэн баран Михаил Элгээйигэ үөрэнэ барбыт. Элгээйи училищетын үчүгэйдик үөрэнэн бүтэрэн баран, биир кыһын Кутанаҕа бииргэ үөрэммит уолаттарынаан улуус дьыалатын бэрийээччиннэн үлэлээбиттэр. Петр Староватов туруорсуутунан хааһына суотугар Иркутскайга учуутал семинариятыгар үөрэххэ ыытар туһунан үөрүүлээх сурук 1909 сыллаахха Кутанаҕа үлэлии сырыттахтарына кэлбит. Төрөппүттэрэ уолларын үөрэххэ ыытартан аккаастаммыттар, Михаил аҕатыттан көрдөһө сатаан баран күрээбит. Сайын от мунньа сылдьан дьонуттан куотан ыалларга саһа сылдьыбыт, үөрэххэ барарыгар көмө көрдөөбүт. Уол үөрэххэ, сырдыкка тардыһарын өйдөөн убайдара, тастыҥ дьон уонна Түбэй ыаллара ким төһө кыахтааҕынан үөрэнэ барарыгар көмөлөспүттэр. 1915 сыллаахха үөрэҕин бүтэрэн Элгээйигэ Сунтаар икки кылаастаах училищетын иккис учууталынан ананан үлэлээбит. Михаил Николаевич билиитин өрүү байытарга кыһанара, элбэхтик ааҕара, санаатын бииргэ үөрэнээччилэрин кытта үллэстэрэ, кэпсиирэ. Төһө да салайар үлэҕэ сырыттар оскуолаҕа эдэр учууталларга үтүө сүбэһит, табаарыс курдук буолара. Оҕолору уруокка эрэ үөрэтииннэн буолбакка уокурук оройуон нэһилиэк олоҕор актыыбынайдык кыттара. Үөрэҕэ суох кэнэн саха ыалын биир бастыҥ уола Анисимов Михаил Николаевич саха ыччата үөрэхтэнэрин, оччоҕо сайдарын, олоҕу сайыннарарын туһугар сыралаһан үөрэммит уонна үлэлээбит олоҕо холобур буолар. Кыһамньылаах үтүө үлэтин иһин Саха сирин үөрэҕириитин бастыҥа аатын ылбыта., өрөспүүбүлүкэтээҕи кыһыл дуоскаҕа тахсыбыта. Өр сыллаах айымньылаах үлэтин иһин 1957 сыллаахха РСФСР үтүөлээх учуутала буолбута. Саха сирэ Россияҕа холбоспута 325 сыла туолуутугар Үлэ кыһыл Знамятын орденынан наҕараадаламмыта. Киэҥ билиилээх, үөрэтии ньыматын баһылаабыт, оҕолорго үчүгэй билиини сатабыллаахтык иҥэрэр Улуу учуутал аатын үөрэммит уонна үлэлээбит Сиэйэ орто оскуолатыгар төрөөбүтэ 100 сааһын көрсө иҥэриллибитэ. Сылдьарын тухары сырдата, үйэлээх сааһыгар үөрэтэ сылдьыбыт үтүөкэн дууһалаах ытык киһибитинэн өрүү киэн туттабыт.