💥Өгбелеривистиң сагып чораан чаагай, чараш чаңчылдары — 17 августа 2026 г. в 03:21:37.118

💥Өгбелеривистиң сагып чораан чаагай, чараш чаңчылдары 📢Хүн ашканда, өгден көс, дус, шай, тараа, ак чем аймаа үндүрбес, черже төкпес. Херээжен кижи сиирин, ине-чүскүүн-даа улуска ачылатпас. Эжик-хаалгазын шартыладыр хаап болбас. Өшкен-не дээш, одаг орну баспас. Өлген-не дээш, адыг бажын артавас. Отту аштап-арыглаары чугула. Отче бок-сак урбас. Эскен паш үстүн өгнүң эр ээзин­ге кудар. Эр кижи хан аксын чигеш, дээшкинин ап алгаш, артыын одунга бээр. Дестиг хан аксын өгнүң хе­рээжен ээзи чиир. Кырыны кадарчы кижиге суп бээр. Ол өшкү-хой кадарып чорааш, ону чараштыр хемдээш, хая хозунга сыыргак чоруур талазын куду баштандыр тургуза шанчып каар. Балдырын хемдээш, аъдым чүгүрүк болзун дээр. Довукту чараштыр хемдээш, кызым чараш болзун дээр. Өзээн малының төш бажын отче салыр. Кошкар-хунаның бажын ха­йындырып хемдээш, чарбайн, бедик черге азып каар. Эр кижи аъдының эзер-чо­наан сойгаш, салып чорударда, чүгени-биле соп хойгузуп болбас. Аът хомудай бээр, ээзинге үрде аът болбайн баар. Паш-саваны кыңгыратпас, аас-кежии, амыдыралы кадыг болур. Эртенги шайның үстүн оранче өргүүр. Согааш, баланы артап болбас, уругларының бажы дүк чок, тас болур. Өгленип алган оол адазының олудунга олурбас, эт-севинге дээп, кайы хамаан­чок аажылап болбас. Кыс кижи аңгыланып чорупкаш, иезиниң ижик-дөжээн ашпас, сыртыын үжевес, аптара, барбазын чиндивес. Авазының олурар черинге олурбас, иезиниң сузун басканы­­ ол. Авазының «кызыл-дустаар» хүнүн манааны ол. Аптара кырынга олурбас. Хүүректи тургуза шашпас, хар кылын, улуг дүжер. / Чылбак МОНГУШ, күш-ажылдың база Херээженнер шимчээш­кининиң хоочуну, РФ-тиң хүндүлүг башкызы. “Шын” №31 2026 чылдың август 13 "Шын" солуннуң МАХ-каналынга каттыжыңар: max.ru/channel_shyn