МБОУ "Сулгачинская средняя школа им. Константинова И.И. - Дэлэгээт Уйбаан"
Образование · 1 июля 2026 г.
Хатыҥ мастан сахалыы чороон иһити кыһан оҥороочу бастыҥа - Егор Яковлев — 1 июля 2026 г. в 01:58:15.436
Хатыҥ мастан сахалыы чороон иһити кыһан оҥороочу бастыҥа - Егор Яковлев «Тыа сирин оскуолата & үөрэҕирии маарката - 2026» XXII өрөспүүбүлүкэтээҕи педагогическай дьаарбаҥка чэрчитинэн, удьуор уус Барыыһаптар сыдьааннара, норуот маастара, Федотов Егор Иннокентьевич аатынан «Удьуор уус ситимэ» төрүт сахалыы иһити-чороон оҥорооччулар өрөспүүбүлүкэтээҕи күөн күрэстэрэ икки күн устата буолан ааста. Төһө да күрэс 2 киһилээх кыттааччылаах буоллар бэрт сэргэхтик ааста, дьон болҕомтотун тарта. Дьүүллүүр сүбэҕэ Егор Иннокентьевич Федотов, тус бэйэтинэн, Дмитрий Алексеевич Артемьев, СӨ норуот маастара, мас ууһа үлэлээтилэр. Күрэскэ Амма улууһуттан эбии үөрэхтээһин педагогтара Артемьев Илья Васильевич уонна Яковлев Егор Семенович күөн көрүстүлэр. Күрэс түмүгүнэн Муҥутуур Кыайыылаах аатын Егор Яковлев ылла. Оттон Илья Артемьев 1 үктэллээх Мэҥэ Суругу тутан, кыайыы өрөгөйүн биллэ. Маны сэргэ, күрэс кэмигэр Амма улууһун СӨ Уус уран оҥоһуктарын маастардарын, СӨ Норуот маастардарын, Уус түһүлгэтигэр Амма улууһун технология учууталларын, педагогтарын иитиллээччилэрин, үөрэнээччилэрин быыстапкалара турбутун, дьон-сэргэ, ыалдьыттар сэҥээрэ, сөҕө-махтайа көрдүлэр. Быыстапканы, чороон күрэһин СӨ үөрэххэ уонна наукаҕа миниистирэ Ньургууна Афанасьевна Соколова, СӨ Ыччат миниистирэ Петр Витальевич Шамаев, Амма улууһун социальной үлэҕэ баһылыгы солбуйааччы Николай Александрович Ларионов, Амма улууһун үөрэҕин салалтатын салайааччыта Татьяна Ивановна Иванова тус бэйэлэринэн кэлэн, сэргээн-кэрэхсээн, көрөн аастылар. Кыайыылаахтар анал грамоталары таһынан, Федотовтар дьиэ кэргэттэрин харчынан анал бириэмийэлэрин тутан, олус үөрэн, махтанан тарҕастылар.