📜 Саха бастакы поэтессатын аатын үйэтитии: Ньурбаҕа Поэзия күнэ олохтонно! 👏🏻 — 13 мая 2026 г. в 03:21:20.513
📜 Саха бастакы поэтессатын аатын үйэтитии: Ньурбаҕа Поэзия күнэ олохтонно! 👏🏻 Бу күннэргэ Күөх Ньурба улууһа бэйэтин талааннаах кыыһын, сахабыт бастакы поэтессатын Варвара Потапова сырдык аатын ахтан-санаан ааһар. Бүгүн, ыам ыйын 13 күнүгэр, Варвара Николаевна төрөөбүтэ 80 сылын туолар. Кини бу орто дойдуга төһө да кылгас уонна уустук олоҕу олорон аастар, бэйэтин хоһоонноругар эппитинии “кэлэр кэмнэргэ кэриэс кэһии, үүнэр үйэлэргэ үрүҥ алгыс” буолар ураты уонна бэлиэ суолу хаалларан барбыта. Поэзия күнэ – култуурабыт чэлгийэ сайдарыгар тирэх Саха Өрөспүүбүлүкэтигэр Култуура сылынан биллэриллибитинэн уонна саха бастакы поэтессата Варвара Николаевна Потапова үбүлүөйдээх сылынан сибээстээн, култуурабыт уонна устуоруйабыт нэһилиэстибэтин харыстыыр, поэтическай айар үлэни өссө сайыннарар сыалтан, Ньурба оройуонугар ыам ыйын 13 күнүн Поэзия күнүнэн биллэрдилэр. Бу күн сыл ахсын Варвара Потапова төрөөбүт күнүгэр үөрүүлээхтик бэлиэтэниэҕэ. Маннык Поэзия күнэ Саха сирин ханнык да атын улууһугар суоҕа Ньурба улууһун бу быһаарыытын өссө уратылаах оҥорор. Күөх Ньурба кыыстарын аатынан маннык күнү олохтообуттара уонна сыл ахсын бэлиэтииллэрэ сахабыт тылын, литературатын, поэзиятын сайдыытыгар уонна култуурабыт үйэтийэригэр олус улахан суолталаах. Бу – кэлэр көлүөнэ ыччат төрөөбүт тылыгар тапталыгар уһуйуллар, айар талаана сайдар уонна норуотун историятын дириҥник үөрэтэр кэрэ түгэнэ буолуоҕа. Биһиги, «Айар» Национальнай кинигэ кыһата, саха бастакы поэтессатын айар үлэтин үрдүктүк тутабыт. Билигин биһиги «ЛитАйар» диэн сыһыарыыбытыгар Варвара Потапова «Мин сырдык санньыарым» диэн хоһооннорун аудио кинигэтэ баар уонна сотору кэминэн электроннай көрүҥэ киириэҕэ. Ону таһынан, инники үлэбитигэр кини хоһооннорун хомуурунньуктарын бэчээттээн таһаарар былааннаахпыт. 💛 Варвара Потапова айымньылара үйэлэртэн үйэлэргэ бэриллэн, саха дьонун сүрэхтэригэр ырыа, хоһоон буолан тыыннаах хаалыахтара.👏🏻