Оскуолабыт иһигэр Аан дойду үрдүнэн бэлиэтэнэр Аҕа саастаахтар күннэрин көрсө лицейбит ...
Оскуолабыт иһигэр Аан дойду үрдүнэн бэлиэтэнэр Аҕа саастаахтар күннэрин көрсө лицейбит бэтэрээн үлэһиттэрин ыҥыран чиэстээһин өрөгөйдөөхтүк буолан ааста. Маны таһынан, бу бэлиэ күн Аан дойдутааҕы музыка күнүн кытта ситимнэһэн, бырааһынньык өссө үрдүк таһымнаахтык ыытылынна. Ол курдук, Ф.С. Аргунов аатынан оҕо искусствотын оскуолатын коллектива кэлэн бэйэтин чаҕылхай кэнсиэринэн күндүлээбитэ улахан кылаат буолла. Бэтэрээннэрбит оҕолор толорууларыгар ырыаны-тойугу, үҥкүүнү-битиини, араас музыкальнай инструменнарынан араас бэйэлээх кэрэ алыптаах музыканы истэн үөрэн, дуоһуйа сынньаннылар. Сүрүн үөрүүлээх түгэнинэн үөрэнээччилэр бэйэлэрин сылаас илиилэринэн, сүрэхтэрин сылааһын иҥэрэн оҥорбут истиҥ иһирэх тыллаах открыткаларын, бэлэхтэрин күндү ыалдьыттарга туттарыылара буолла. Кэнсиэр кэнниттэн көрсүһүү сылаас эйгэҕэ остуол тула салҕанна. Оскуолабыт профсоюһун күүһүнэн бэтэрээн үлэһиттэргэ анаан мааны остуол тэрилиннэ. Остуол тула сылаас, истиҥ кэпсэтии, ааспыты ахтыһыы буолла. Тэрээһин кэмигэр профсоюз аатыттан уһун сыралаах үлэлэрин иһин махтал тыллар этилиннилэр уонна өйдөбүнньүк эҕэрдэ суруктар үөрүүлээх быһыыга-майгыга туттарылыннылар. Үгүс сылларга оскуола туһугар үлэлээбит бэтэрээннэрбит оҕолор болҕомтолорун иһин махталларын биллэрдилэр. Бу көрсүһүү көлүөнэ ситимэ быстыбатын өссө төгүл дакаастаата.