Ытыктабыллаах Чурапчы улууһун олохтоохторун улуус салалтатын уонна тус бэйэм ааппыттан ... — 31 мая 2026 г. в 23:16:46.239
Ытыктабыллаах Чурапчы улууһун олохтоохторун улуус салалтатын уонна тус бэйэм ааппыттан Оҕо көмүскэлин күнүнэн ис сүрэхпиттэн эҕэрдэлиибин! Бэс ыйын 1 күнүгэр үгэскэ кубулуйбут кэрэ бырааһынньыгы – Оҕо көмүскэлин күнүн бэлиэтиибит. Оҕо - хас биирдии ийэни, аҕаны дьоллуур, үрдүккэ кынаттыыр, үчүгэйи, үтүөнү оҥорор дьулууру, оҕону көмүскүүр, харыстыыр баҕаны, тапталы, кыһамньыны, эппиэтинэһи күүһүрдэр. Оҕо көмүскэлин күнүн үрдүк анала – судаарыстыба уонна биһиги хас биирдиибит оҕолорбутугар сөптөөх усулуобуйаны тэрийэн, олоххо тардыһыылаах, сиэрдээх, дьоллоох киһи гына иитэр-такайар соруктаахпытын санатыы. Оҕо аймаҕы өйүүр, сайыннарар сорук биһиги өрөспүүбүлүкэбитигэр, улууспутугар мэлдьи өрө тутуллан кэллэ. Ил Дархан гранын ылбыт “Ыал саргыта” бырайыакпыт иитинэн оҕо аймах дьоллоох дьиэ кэргэҥҥэ иитиллэр эйгэтэ өйөнөр, сайдар. Элбэх оҕолоохторго көрүллэр кэккэ көмөлөр, оҕо төрөөһүнүгэр хапытаал, олорор дьиэлэниигэ чэпчэтиилэр, биир кэлим судаарыстыбаннай эксээмэҥҥэ муҥутуур үрдүк баалы ылбыт оскуоланы бүтэрэр бастыҥ үөрэнээччигэ биир кэмнээх төлөбүр курдук өйөбүллэр, оҕо уһуйааннарын, оскуолалары тутуу, сайыҥҥы лааҕырдары үлэлэтии – барыта онно туһуланаллар. Кэнчээри ыччаты наукаҕа, технологияҕа сыһыаран, дьоҕурун сайыннарыыга, үөрэҕин уонна доруобуйатын тупсарыыга, куруһуоктарга интэриэстэринэн уонна успуордунан дьарыктаныыга усулуобуйа сыллата тупсарыллан иһэр. Бу сырдык, кэрэ бырааһынньыгынан төрөппүттэри, учууталлары, иитээччилэри, социальнай үлэһиттэри эҕэрдэлиибин, үүнэр көлүөнэни иитиигэ биир киһи курдук кыһамньыгыт иһин махтанабын. Сыралаах үлэҕитигэр тулууру, энчирээбэт эрчими уонна ситиһиилэри баҕарабын. Күндү оҕолор! Эһиэхэ дьолу-соргуну, үтүө баҕа санааларгыт туолалларыгар, күлүм-чаҕыл күннээх, умнуллубат сынньалаҥы, кустук өҥүнүү дьэрэкээн түгэннэри, дьоллоох оҕо сааһы баҕарабын! Хас биирдии дьиэ кэргэҥҥэ уйгулаах олох уонна өйдөһүү өрөгөйдөөтүн, оҕо саҥатынан чугдаара туола турдун!