Арассыыйаҕа Норуоттар сомоҕолоһуулара, Саха Өрөспүүбүлүкэтигэр Култуура, Сунтаар улууһу... — 20 апреля 2026 г. в 12:47:23.714

Арассыыйаҕа Норуоттар сомоҕолоһуулара, Саха Өрөспүүбүлүкэтигэр Култуура, Сунтаар улууһугар номох уонна сайдыы сылларыгар  аналлаах «Олоҥхо дойдутун оҕолорун оһуордаах түһүлгэтэ» II улуустааҕы фестивальга  оскуолалар көхтөөх кыттыыны ылаллар. Бу фестиваль былырыыҥҥыттан «Олоҥхо дойдутун оҕолорун оһуордаах түһүлгэтэ»  диэн Сунтаар улууһун үөрэҕин саламтатын  бырайыагын  чэрчитинэн  ыытыллар.   Фестиваль үс хайысхалаах: фольклор, музейнай педагогика уонна оҕолор айар быыстапкалара. Музейнай педагогикаҕа  хас биирдии үөрэх тэрилтэтэ төрөөбүт нэһилиэктэрин историятын 1941 сылга дылы сырдаталлар. Айар быыстапкаҕа үөрэнээччилэр айылҕа матырыйаалыттан оҥоһуктарын көрдөрүөхтэрэ. Былырыын С.А.Зверев-Кыыл Уола төрөөбүт сириттэн Түбэй-Дьаархантан фестиваль саҕаламмыта. Быйылгы фестиваль олоҥхоһут Мэкчиргэ Уола Бэһэлэйдээх Мэхээлэ(1830-1915) дойдутуттан Хадантан саҕаланна. Хадан орто оскуолатын, Туойдаах оскуолатын  үөрэнээччилэрэ фольклорга дьоҕурдарын, талааннарын көрдөрдүлэр. «Олоҥхо дойдутун оҕолорун оһуордаах түһүлгэтэ»  фестивальга саха омук төрүт үгэһин, сиэрин-туомун, фольклорун, нэһилиэктэрин историятын үүнэр көлүөнэ үөрэтэрэ  кэскиллээх.   Хас биирдии норуот бэйэтин төрөөбүт тылын, төрүт культуратын  үөрэтэн, сайыннаран, сүтэрбэккэ көлүөнэттэн көлүөнэҕэ тиэрдэр ситимэ салҕанан Сунтаар улууһун үүнэр көлүөнэтин түһүлгэтэ кэҥиир.