МБОУ "ВВССОШ ИМ. Ю.Н. ПРОКОПЬЕВА" МР "ВЕРХНЕВИЛЮЙСКИЙ УЛУС (РАЙОН)" РЕСПУБЛИКИ САХА (ЯКУТИЯ)
Образование · 1 сентября 2026 г.
Убаастабыллаах Үөһээ Бүлүү улууһун олохтоохторо! — 1 сентября 2026 г. в 09:13:53.950
Убаастабыллаах Үөһээ Бүлүү улууһун олохтоохторо! Күүтүүлээх, үтүө үгэскэ кубулуйбут Билии күнэ үүннэ! Бу күн биһиги бары үөрүү-көтүү аргыстаах, үтүө эрэл санаалаах үөрэх эйгэтигэр эргиллэбит. Быйыл Үөһээ Бүлүү улууһугар 2913 үөрэнээччи саҥа үөрэх дьылын саҕалыыр, ол иһигэр 246 оҕо маҥнайгы кылааска киирэллэр. Маны таһынан, быйыл биһиги улууспут үөрэҕэриитин 150 сылын бэлиэтиир үбүлүөйүгэр эдэр көлүөнэ учууталлары иитэр С. Ф. Гоголев аатынан Дьокуускайдааҕы педагогическай колледж Үөһээ Бүлүүтээҕи салаата арыллара улууспут үөрэҕэриитин сайдыытыгар саҥа кэрдиис кэм кэлбитин бэлиэтиир. Үөһээ Бүлүү улууһа 3 норуот учууталлаах, дириҥ, баай историялаах, үөрэх-билии биһигэ буоларынан киэн туттан туран учууталларбыт, оҕолорбут саӈа үөрэх сылыгар кыһамньылаахтык үлэлээн, үөрэниӈ диэн ыӈырабын! Саҥа үөрэх сылынан эһигини, билиигэ уонна сайдыыга дьулуһар, ыраас ыралаах үөрэнээччилэри, күүс-көмө, өйөбүл буолар төрөппүттэри, ыччаты олох суолугар сирдиир, билии күүһүн иҥэрэр учууталлары эҕэрдэлиибин! Күндү учууталларбыт! Эһиги күннэтэ оҥорор үлэҕит – кэнчээри ыччаппыт кэскилин тутула, Саха Өрөспүүбүлүкэтин инники сайдыытын төрдө. Эһиги дьулуургутугар, сыралаах үлэҕитигэр, улуус инникитигэр туохха да тэӈнэммэт сүдү кылааткытыгар махтанабын. Саҥа үөрэх дьылыгар айымньылаах үлэни, үтүө ситиһиилэри, чөл доруобуйаны, дьолу-соргуну, үөрэнээччилэргит уонна төрөппүттэргит өйөбүллэрин баҕарабын! Күндү үөрэнээччилэр! Эһигини Билии күнүнэн итиитик-истиҥник эҕэрдэлиибин! Үөрэх – эһиги олоххут сүрүн баайа, инники кэскилгит аартыга. Билии эһиэхэ саҥа ааннары арыйдын, инники туруорунар сыалгытын ситиһэргэ күүс-көмө буоллун. Учууталларгыт, төрөппүттэргит сүбэлэрин истэн, чиҥник үөрэнэргитигэр, саҥаны билэргэ дьулуһаргытыгар, доҕотторгутун кытта эйэлээхтик алтыһаргытыгар баҕарабын. Үөрэнэргит тухары билиигэ тардыһыыны, кыайыыга дьулууру уонна үөрүүнү сүтэрбэт буолуҥ! Ытыктабыллаах төрөппүттэр! Эһиги оҕолоргутугар оҥорор өйөбүлгүт, өйдөһүүгүт, үөрэх эйгэтин кытта ыкса ситимӈит - ситиһиилээх үөрэх дьылын тирэҕэ. Оҕолоргутун өйөөн, билиигэ угуйан, дьоһуннаах дьон оҥорон таһаараргытыгар баҕарабын! Үөрүү-көтүү аргыстаах, ситиһиилээх үөрэх дьылын! Барыгытыгар чөл доруобуйаны, үтүө санааны, этэҥҥэ буолууну баҕарабын! Эҕэрдэни кытта, Үөһээ Бүлүү улууһун баһылыга В. В. Николаев #1сентября #БалаҕанЫйын1Күнэ #БилииКүнэ #ДеньЗнаний #ҮөһээБүлүү max.ru/channel_VNikolaev