Кэскиллээх кэнсиэргэ кэрэ кэм түмүлүннэ — 15 мая 2026 г. в 11:19:25.272
Кэскиллээх кэнсиэргэ кэрэ кэм түмүлүннэ Үөрэх дьылын түмүктүүр "Гимназия сулустара" бырааһынньыктааҕы кэнсиэр бүгүн, ыам ыйын 15 күнүгэр, Дьиэ кэргэн Аан дойдутааҕы күнүгэр, Олоҥхо дьиэтигэр ыытылынна. Бу тэрээһин ааспыт кэм баай уопутун, аныгы кэм ситиһиилэрин түмэн, кэнэҕэски ыччаппыт сырдык кэскилин түстүүр дьоллоох түгэнинэн буолла. Кэнсиэр саҕаланыытыгар оскуола директорын үөрэх чааһыгар солбуйааччы Терентий Федотов оскуола олоҕор көхтөөхтүк кыттар төрөппүттэргэ махтал суруктары үөрүүлээх быһыыга-майгыга туттарда. Быйылгы 2025-2026 үөрэх дьыла Үөһээ Бүлүү улууһун үөрэҕириитин систиэмэтэ төрүттэммитэ 150 сылын чиэстээн, ураты суолталаах уонна үөрүүлээх буолла. Сүүс ордугуна үйэ аҥара кэм устата Үөһээ Бүлүү сиригэр-уотугар үөрэх-билии бастакы хараҥаччылара кэлитэлээн барбыттара. Бу уһун суол устата элбэх көлүөнэ учууталлар, педагогтар оҕону-ыччаты үөрэххэ-билиигэ сыһыарбыттара, үтүө дьон гына ииппиттэрэ. Элбэх талааннаах, үрдүк билиилээх дьоммут Үөһээ Бүлүүнэн, Саха сиринэн, Арассыыйанан даҕаны ааттара-суоллара ааттанна. Бүгүҥҥү "Гимназия сулустара" кэнсиэр убаастабыллаах педагогическай общественность чулуу учууталларын, туох баар үлэһиттэрин уруйдуур, барҕа махталбытын тиэрдэр, үйэтитэр бэлиэ күн буолар. Ол да иһин айар талаан дьоһун түһүлгэтэ Д. С. Спиридонов аатынан улуустааҕы гимназия оҕолорун айар талааннарын, үөрэнээччилэр араас хайысхаҕа ситиһиилэрин көрдөрөр бэртээхэй тэрээһин буолла. Сыанаҕа тахсыбыт оҕолор, гимназия сулустарын курдук, чаҕылхайдык уонна дьоҕурдарын толору көрдөрдүлэр. Оҕолор классическай уонна сахалыы ырыалары иэйиилээхтик толордулар. Кылгас кэмҥэ үөрэнээччилэр ырыа тылын дириҥ ис хоһоонун дьоҥҥо-сэргэҕэ тиэрдэн, сүрэхтэрин долгуттулар. Үҥкүүһүттэр сахалыы да, аныгылыы да үҥкүүлэринэн сыананы киэргэттилэр. Кинилэр имигэс хамсаныылара, ураты көстүүмнэрэ уонна биир кэлим туттуулара көрөөччүлэри сөхтөрдө. Хас биирдии үҥкүүгэ оҕолор үөрүйэхтэрэ, кыһамньылара көстө сылдьар. Маны сэргэ оҕолор төрөөбүт дойду, таптал, ийэ тыл, үөрэх туһунан хоһооннору иэйиилээхтик аахтылар. Кинилэр саха тылын кэрэтин, дорҕоонун, дириҥ ис хоһоонун толору арыйдылар. "Гимназия сулустара" кэнсиэр 2025-2026 үөрэх дьылын түмүктүүр дьоһун тэрээһининэн буолла. Бу күн оҕолор ааспыт үөрэх дьылыгар ылбыт билиилэрин-көрүүлэрин эрэ буолбакка, айар уонна сценическэй дьоҕурдарын көрдөрдүлэр. Үөрэх дьылын бүтүүтэ, сайыҥҥы сынньалаҥ иннинэ, оҕолор бэйэлэрин бастыҥ өрүттэрин көрдөрөр, үөрүүлэрин үллэстэр кэрэ түгэнинэн буолла. Көрөөччүлэр – төрөппүттэр, учууталлар, нэһилиэк олохтоохторо – оҕолор ситиһиилэринэн киэн туттан, сылаас ытыс тыаһынан доҕуһуоллаатылар. Улуус үөрэҕириитин 150 сыллаах үбүлүөйүнэн сибээстээн, инникитин даҕаны үөрэх хаачыстыбатын үрдэтэргэ, оҕолор талааннарын сайыннарарга уонна төрөөбүт дойдуларын таптыыр, киэн туттар патриот дьону иитэргэ анаммыт саҥа соруктары туруоруннулар. "Гимназия сулустара" кэнсиэр – бу биир эрэ үөрүүлээх түгэн буолбатах, бу – Үөһээ Бүлүү улууһун үөрэҕириитин систиэмэтин үйэлээх утума салҕанарын, кэнэҕэски көлүөнэ талааннаах уонна билиилээх буолан улаатарын бэлиэтэ. Онон, бу кэнсиэр олохтоохтор сүрэхтэригэр сырдык, умнуллубат өйдөбүлү хаалларан, инники кэскилгэ эрэли уонна күүһү иҥэрдэ. Үөһээ Бүлүү үөрэҕириитэ чэлгийэ сайда турдун! #Үөрэҕирии150сыла #Улуустааҕыгимназия #Отчуоттууркэнсиэр #Үйэтитии #Махталлаахкөлүөнэ Галина Васильева