САХА ӨРӨСПҮҮБЛҮКЭТИН КҮНҮНЭН! — 25 апреля 2026 г. в 10:49:59.771
САХА ӨРӨСПҮҮБЛҮКЭТИН КҮНҮНЭН! Муус устар 27 күнэ Саха сирин остуоруйатыгар ураты суолталаах. 1920 с. П.А. Ойуунускай салайааччылаах анал хамыыһыйа национальнай суверенитекка олоҕурбут Саха Өрөспүүбүлүкэтин кэлэр дьылҕатын быһаарар бырайыагы бэлэмнээбитэ. Биир сүрүн көҕүлээччи М.К. Аммосов этэ. Чопчу кини ССКП уонна РСФСР Омуктар дьыалаларыгар норуодунай комиссариатын иннилэригэр Саха Автономнай Сэбиэскэй Социалистическай Өрөспүүбүлүкэтин тэрийэр туһунан боппуруоһу көтөхпүтэ. Кини дакылаатыгар олоҕуран, уобаластааҕы баартыйа мунньаҕа автономияны киллэрэр туһунан резолюция ылыммыта. Маны 1921 с. алтынньытыгар буолбут Саха сиринээҕи өрөбөлүүссүйэ кэмитиэттэрин бастакы сийиэһигэр эмиэ өйөөбүттэрэ. 1922 с. муус устар 27 күнүгэр ВЦИК Президиума Саха Автономиятын туһунан уураах таһаарбыта. Ити сыл бэс ыйыгар Ойуунускай салайааччылаах бастакы бырабыыталыстыба тэриллибитэ. 1990 с. балаҕан ыйын 27 күнүгэр Саха Өрөспүүбүлүкэтин Судаарыстыбаннай Суверенитетын туһунан декларация ылыллыбыта. 1991 с. ахсынньы ыйыгар бастакы бэрэсидьиэнинэн М.Е. Николаев талыллыбыта. 1992 с. муус устар 27 күнүгэр Саха Өрөспүүбүлүкэтин Төрүт Сокуона (Конституцията) күүһүгэр киирбитэ. Билигин муус устар 27 күнүн Өрөспүүбүлүкэ күнүн быһыытынан билинэбит! Бүгүн, муус устар 25 күнүгэр оскуолабытыгар Саха Өрөспүүбүлүкэтин күнүгэр аналлаах нэдиэлэ устата ыытыллыбыт тэрээһиннэрбитин түмүктээн, сахалыы таҥас кэтэн, саха омук маанылаах аһылыгын алаадьы буһаран үөрэнээччилэрбитигэр айах туттубут. Бэлиэ күнү уруйдаан флешмоб үҥкүүлээтибит, оһуохайдаан тэптибит. Оскуола кэллэктиибэ.