🌲🪓 Сүгэ тыаһа, костёр уота уонна сүрэх сылааһа: Дьэлиҥдэ орто оскуолатын үлэһиттэрин ... — 20 мая 2026 г. в 13:52:05.750
🌲🪓 Сүгэ тыаһа, костёр уота уонна сүрэх сылааһа: Дьэлиҥдэ орто оскуолатын үлэһиттэрин үгэс буолбут субуотунньуга! Бу күннэргэ Дьэлиҥдэ орто оскуолатын профсоюһун үлэһиттэрэ уонна үөрэнээччилэрэ, оскуола паарталарын уонна үөрэх кабинеттарын уларытан, хотугу тайҕабыт уорҕатыгар ким сүгэ, ким дружба тутуурдаах таҕыстылар. Сыллата ыытыллар уонна үгэскэ кубулуйбут айылҕаҕа субуотунньукпут быйыл даҕаны ураты тыыннаах, доҕордуу уонна үрдүк тэрээһиннээхтик ааста! Хоту дойдубут кыһына уһун уонна тымныы, ол иһин кураанах, чуораан курдук тыаһыыр мас — бу тыыннаах буолуу, дьиэ сылааһынан бүрүнэр бэлиэтэ. Үлэһиттэр бары биир киһи курдук сомоҕолоһон, маһы саамай наадыйар дьоммутугар- ытык кырдьа5астарбытыгар уонна оскуолабыт дьоҕус хаһаайыстыбатыгар (кууруссаларбытыгар) анаан мас бэлэмнээтибит. Тыаҕа үлэ сарсыардаттан күөстүү оргуйда. Дружба, сүгэ тыаһа, оҕолор саҥалара иһиллиэҕиттэн чуумпу тайҕабыт уһуктубут курдук буолла. Дэлиҥдэ орто оскуолатын оҕолоро учууталларын кытта тэҥҥэ үлэлээн, хотугу сир дьонун сүрүн хаачыстыбатын — үлэни уонна бэйэ-бэйэҕэ күүс-көмө буолууну иҥэриннилэр. Күүстээх үлэ кэнниттэн барыбытын уот тула истиҥ сынньалаҥ күүттэ. Эбэҥкилии сиэринэн костёр уотугар итии чэй, уот сылааһа уонна төрөөбүт айылҕабыт кэрэтэ барыбытын өссө күүскэ сомоҕолоото. Бу субуотунньук — сүрэхтэн тахсар үтүө үгэс, дьон бэйэ-бэйэҕэ көмөлөһүүтэ уонна көлүөнэлэр ситимнэрэ. Оскуолабыт үлэтин, үөрэҕириини сайыннарбыт ытык кырдьаҕастарбытыгар көмөлөһүү — биһиги ытык иэспит. Кыһыҥҥы уһун киэһэлэргэ кинилэр дьиэлэрин оскуола үлэһиттэрин уонна үөрэнээччилэрбит илиилэрин сылааһа, истиҥ сыһыана кинилэр сүрэхтэрин уонна дьиэлэрин сылыттын! Оскуолабыт бэйэтэ кыракый кынаттахтардаах дьоҕус хаһаайыстыбалаах. Кинилэргэ кыһын тымныыта — улахан тургутуу буолар. Кууруссаларбыт сылааска, уйгуга этэҥҥэ кыстыылларын уонна дьону-сэргэни сибиэһэй сымыытынан хааччыйалларын туһугар, дьиэлэрин сылытарга анаан үчүгэй маһы бэлэмнээтибит.