От ыйын 10-11 күннэриггэр Нам улууһун Таастаах нэһилиэгэр умнуллубат бэлиэ Ала ууһун Үр...
От ыйын 10-11 күннэриггэр Нам улууһун Таастаах нэһилиэгэр умнуллубат бэлиэ Ала ууһун Үрүҥ Тунах ыһыаҕа үрдүк таһымҥа ыытыллан, өрөгөйдөөхтүк түмүктэннэ. Түҥ былыргы, аата ааттанар, улуу Атамай ууһун аатын илдьэ хаалбыт Горнай улууһун Атамай нэһилиэгиттэн 28 киһилээх дэлэгээссийэ Таастаахха тиийэн, кэрэхсэбиллээх ыһыахха көхтөөхтүк кыттынна. Биир силистээх, биир өбүгэлээх нэһилиэктэр – Нам улууһуттан Таастаах, Хомустаах, Партизан, Салбаҥ уонна Горнайтан Атамай, Одуну дьоно-сэргэтэ муһуннулар. Ала ууһа Атамай архыып докумуоннарынан Кэбээйи, Горнай, Нам сирдэринэн тайаан сыппыта былыргы кэмтэн биллэр. Бу курдук төрүт историяны кэрэхсиир дьон, кинилэр кэнчээри ыччаттара түмсэ сылдьаллара олус кэрэхсэбиллээх, үтүө холобур буолар. Ыһыах кэмигэр Ала ууһун дьоно мустан, элбэх холбоһуктаах кэнсиэри көрдөрдүлэр, тимир уһаардылар, Ала боотурдара күүстэрин холоннулар. Биһиги нэһилиэкпититтэн хапсаҕайга Эрчимэн Максимов тэҥнээҕин булбата, ыраас кыайыыны ситэн, убаһанан наҕараадаланна. Хомуһуннаах хомуска оонньооһуҥҥа Александр Максимов, Кэрэ куолар куоҥкурустарыгар Сааскылаана Жиркова, Төрүт оҕунан ытыыга Атамай хамаандата үһүс үктэлгэ таҕыстылар. Мас тардыһыытыгар кэрэ аҥаардарга Ньургустаана Федотова кыайыылаах үрдүк аатын сүктэ. Саха таҥаһын көрүү күрэҕэр Прокопий уонна Мария Яковлевтар дьиэ кэргэттэрэ, уонна Роман уонна Надежда Федоровтар дьиэ кэргэттэрэ анал бириистэринэн наҕараадаланнылар. Бу курдук Ала ууһун Ыһыаҕа нэһилиэктэрбит сомоҕолоһууларын, төрүт үгэстэрбитин сөргүтэргэ, кэнчээри ыччаты иитиигэ биир сүрүн олугу олохтууругар саарбахтаабаппыт.