*Киэн туттар биир дойдулаахпытын, Балаҕаннаах нэһилиэгиттэн төрүттээх Россия дуобакка с... — 30 мая 2026 г. в 03:19:22.746
*Киэн туттар биир дойдулаахпытын, Балаҕаннаах нэһилиэгиттэн төрүттээх Россия дуобакка спордун маастарын Антонина д Аввакумованы Турцияҕа ыытыллыбыт дуобакка Аан дойду чемпионатыгар ситиһиилээхтик кыттан, Аан дойду чемпионун үрдүк аатын сүкпүтүнэн ис сүрэхпиттэн үөрэн туран эҕэрдэлиибин!* Санатан эттэххэ, быйыл муус устарга доруобуйаларынан хааччахтаах дьоҥҥо нуучча дуобатыгар Россия чемпионата ыытыллыбыта. Антонина Тимофеевна Саха сирин аатыттан баран кыттыыны ылан, бастакы миэстэ хаһаайынынан буолбута уонна дойдубут сүүмэрдэммит хамаандатын састаабыгар киирэн, Турцияҕа Аан дойду чемпионатыгар путевка ылбыта. Ол путевканан баран бу улахан түһүлгэҕэ Россия чиэһин көмүскээтэ, Сахатын сирин, төрөөбүт-үөскээбит Үөһээ Бүлүүтүн дорҕоонноохтун ааттатта. Антонина эрэллээхтик оонньоон, Аан дойду чемпионун үрдүк аатын сүктэ. Бу - кыыспыт бастакы ситиһиитэ буолбатах. Кини икки сыллааҕыта доруобуйаларынан хааччахтаах дьоҥҥо Аан дойду түһүлгэтигэр соһуччу баран, отой үчүгэйдик кыттыбыта. Ол курдук, бастакы миэстэни ылан, барыбытын соһуталаабыта. Онно кинини көрөн-билэн, Антонинаны Россия састаабыгар киллэрбиттэрэ. Бэл диэтэр, Саха сиригэр кини туһунан билбэккэ сылдьыбыттара. Урукку өттүгэр кини диспциплинатыгар (ол аата ПОДА, сүһүөхтэринэн ыалдьан дьон) Саха сириттэн ким да баран кыттыбат эбит. Мөлтөхтүк истэр эрэ дьон баран кытталлара. Онтон Антонина Аввакумованы улуус тэрийэн, бэйэтэ баҕатынан баран кыттыбыта. Бу күрэхтэһиигэ үчүгэйдик кыттыбытыгар биирдэ Саха сирэ билэн, билигин чиҥник Саха сирин сүүмэрдэммит хамаандатын састаабыгар киирдэ уонна Россияҕа баран сүрдээх чаҕылхайдык кыттар. *Антонина ситиһиилэрин туһунан улуустааҕы спорт уонна физическай культура управлениетын салайааччыта Егор Николаев бу курдук санаатын үллэһиннэ:* - Быйылгыта Россия чемпионата сүрдээх ыгымнык ааспыта. Тоҕо диэтэххэ, чемпионат сүүмэрдээһинэ быйыл ыытыллыахтаах Саха сирин «Дьулуур» спартакиадатын кытта бириэмэтэ бииргэ түбэһэн хаалбыта. Онно үп-харчы булан, Москваҕа Россия чемпионатыгар баран кытта охсон кэлээт, аны Саха сиригэр кэлэн улууһун чиэһин ситиһиилээхтик көмүскээбитэ. Онтон көрдөрүнэ баран кэлтэ. Онон Антонина быйыл олус сылайда, үп-харчы даҕаны өттүнэн уустуктары көрүстэ. Биһиги төһө кыахпыт баарынан көмөлөһө сатыыбыт. Дьиэ кэргэнэ кыыстарын өйүүр буолан, күүскэ күрэхтэһэ сылдьар. Антонина эһиил Ньурбаҕа ыытыллыахтаах спартакиадабытыгар хамаанда састаабыгар баар. Төһө да доруобуйатынан хааччахтааҕын иһин, эдэр киһи доруобай дьону кытта киирсиэхтээх. Онно бэлэмнэниэхтээх. Сүрүн күрэхтэрэ быйыл ситиһиилээхтик түмүктэннилэр. Онон үчүгэйдик сынньаныан, реабилитацияланыан наада. Салгыы күүс-уох ылынан баран, эһиилги отборга путевка ылар иһин киирсиэхтээх уонна Ньурбаҕа Саха сирин норуоттарын IX спартакиадатыгар баран кыттыахтаах. *Антонина Тимофеевнаны Аан дойду таһымнаах чаҕылхай ситиһиитинэн өссө төгүл эҕэрдэлээн туран, инникитин да этэҥҥэ буолууну, үөрүү-көтүү үктэллээх ситиһиилэр сиэттиһэн кэлэ туралларыгар баҕа санаам бастыҥын тиэртэҕим буоллун!* #Спорт #Киэнтуттарбиирдойдулаахпыт #Аандойдучемпионата #Нууччадуобата http://T.me/ValeriNikolaev