Бу дьыл муус устар 4-5 күннэригэр, Бороҕон нэһилиэгэр, спорт бэтэрээнэ, Манчаары оо... — 6 апреля 2026 г. в 05:32:50.444
Бу дьыл муус устар 4-5 күннэригэр, Бороҕон нэһилиэгэр, спорт бэтэрээнэ, Манчаары оонньууларын мас тардыһыытыгар абсолютнай чемпиона, Быкалыров Степан Алексеевич кэриэһигэр, төрөөбүтэ 80 сааһыгар анаан мас тардыһыытыгар өрөспүүбүлүкэтээҕи күрэс киэҥ хабааннаахтык уонна үрдүк таһымнаахтык ыытыллан түмүктэннэ. Барыта 15 улуустан уонна Дьокуускай, Мииринэй куораттарыттан 80 мадьыны күөн көрүстүлэр, ол иһигэр 2 международнай кылаастаах маастар, 7 Россия маастара, 7 Саха Республикатын маастара, 4 спорт маастарыгар хандьыдаат аат ааттаан кэлэн күүһүн холосто. Онон хас ыйааһын аайы сытыы киирсиилэр буоллулар. Күрэс сүрүн судьуйатынан, международнай кылаастаах судьуйа, Кэрэчээнэ Николаева үлэлээтэ, күрэхтэһиини саҥаран-иҥэрэн салайан ыытта Василий Пестряков. Күрэх үөрүүлээх арыллыытыгар сүрүн спонсор- "Киэргэ" ювелирнай хампаанньа дириэктэрэ Павлов Александр Кириллович, Саха Өрөспүүбүлүкэтин мас тардыһыыга Федерациятын Бас сэкиритээрэ Татьяна Дьячковская, Бороҕон нэһилиэгин баһылыга Анатолий Олегович Васильев, С.А.Быкалыров дьиэ кэргэнэ, күрэхтэһии главнай судьуйата Кэрэчээнэ Николаева бары кыттааччыларга уонна тэрийээччилэргэ эҕэрдэ, махтал тылларын анаатылар. Быйылгы күрэс өрөспүүбүлүкэ араас улуустарыттан элбэх кыттааччыны, мас тардыһыытынан утумнаахтык дьарыктанар спортсменнары түмпүтүн бэлиэтээтилэр. Ыһыылаах-хаһыылаах икки күннээх тыҥааһыннаах күрэххэ эр дьоннор 10 ыйааһыҥҥа, бэтэрээн эр дьоннор 3 ыйааһыҥҥа, дьахталлар 4 ыйааһыҥҥа кииристилэр, ону таһынан 70 кг. дылы уонна 70 кг.үөһэ ыйааһыннаахтарга абсолютнай чемпион аатын былдьастылар. Түмүккэ бары ыйааһыннарга кыайыылаахтар быһаарылыннылар, мэдээллэринэн уонна сыаналаах бириистэринэн наҕараадаланнылар. 75 кг.дылы ыйааһыннаахтарга абсолютнай чөмпүйүөн аатын ылары ситистэ Тааттаттан Константин Жирков уонна 100 тыһ.солк.наҕараадаланна, 75 кг.үөһэ ыйааһыннаахтарга абсолютнай чөмпүйүөнүнэн Өлүөхүмэ к. мадьыныта Евгений Попов буолан 100 тыһ.солк.наҕараадаланна. Өбүгэбит төрүт үгэһин – мас тардыыһытын – сэҥээрээччилэргэ, салҕааччыларга икки күннээх күрэхпит ситииһиилээхтик түмүктэммитинэн итии-истиҥ эҕэрдэ буоллун! Күрэс үрдүк таһымҥа ыытылларыгар уонна кыайыылаахтарга бириистэри спонсордаабыт "Киэргэ" ювелирнай хампаанньаҕа (салайааччы Александр Кириллович Павлов), Степан Алексеевич Быкалыров бары чугас дьонугар, аймахтарыгар, "Булуу улууһа (оройуона)" дьаһалтатыгар (баһылык Винокуров Сергей Николаевич), "Бастакы Тоҕус" нэһилиэгин дьаһалтатыгар, Хампа с. урбаанньыт Семенова Альбина Валерьевнаҕа, Тыымпы с. урбаанньыт Гоголева Виктория Николаевнаҕа, Балаҕаччы с. урбаанньыт Попов Айсен Витальевичка, Нам улууһуттан урбаанньыт Новиков Михаил Егоровичка, Бороҕон нэһилиэгин урбаанньыттарыгар Алексеева Антонина Анатольевнаҕа, Фомина Ульяна Владимировнаҕа, Мальцев Иван Николаевичка, Бороҕонтон төрүттээх биир дойдулаахтарбытыгар, нэһилиэкпит олохтоохторугар, оскуола, интернат коллективтарыгар, курэхтэһии ыытыытыгар көмөлөспүт волонтер оҕолорбутугар, спортсменнары итии, минньигэс аһылыгынан күндүлээбит бары дьоммутугар улахан махталбытын биллэрэбит! Бороҕон нэһилиэгин олохтоох дьаһалтата.