Бэс ыйын 4 күнүгэр Соморсун нэһилиэгэр, өрөспүүбүлүкэҕэ Култуура сылынан, култуура эйгэ... — 9 июня 2026 г. в 01:50:49.527
Бэс ыйын 4 күнүгэр Соморсун нэһилиэгэр, өрөспүүбүлүкэҕэ Култуура сылынан, култуура эйгэтин үлэһиттэрин оҕолоругар анаан, тулалыыр эйгэ күнүн көрсө, аан бастакытын оҕолорго аналлаах экологическай слет ыытылынна. Экологическай слет саха норуотун тапталлаах ырыаһыта, ырыа айааччыта, РФ култууратын үтүөлээх үлэһитэ, СӨ култууратын үтүөлээх үлэһитэ, СӨ үөрэҕин туйгуна, СӨ айылҕатын харыстааһын туйгуна, » Саха-Азия оҕолоро» фонд стипендиата Ольга Петровна Иванова — Сидоркевич аатынан ыытыллынна. Сүрүн сыалынан Ольга Петровна оҕону иитэн, айылҕаҕа сыһыарыыга, таптыырга холобурдаабыт суолун үүнэр көлүөнэҕэ иҥэрии буолар. Ол курдук оҕолор бу күн «Знания», «Практика», «Творчество» түһүмэхтэринэн күрэхтэстилэр. Бу түһүмэхтэргэ Амма өрүспүт баайын, тыынар тыыннааҕын, кини кырдалыгар үүнэр эмтээх оттор тустарынан, Аммабыт туһунан хоһоон айдылар, Ольга Иванова дьүрүлүнэн үҥкүүлээтилэр, уруһуйдаатылар уонна эт-хаан өртүнэн туруктарын тургутан «Веревочный парк» аастылар. Түмүккэ Сулҕаччы нэһилиэгин «Айылҕа көмүскээччилэрэ» хамаандата муҥутуур кыайыылааҕынан таҕыста. Иккис миэстэ Мээндиги нэһилиэгин «Амма харыстааччылара» уонна үһүс бочуоттаах миэстэ Соморсунтан «Флажки» хамаанда буоллулар. Хас биирдии кыттааччыыга туоһу сурук, минньигэс бэлэх, анал статуэтка бэлэх бэриллиннэ. Онтон кыайыылаахтарга — илии тапталынан тигиллибит олбохтор бэлэх уунуллуннулар. Бу күн, Соморсуннааҕы В. Е. Васильев — Харысхал норуот айымньытын дьиэтин кэлэктиибэ оҕолору, ыалдьыттары хонуу куухунатыгар, минньигэс да минньигэс эбиэтинэн күндүлээтилэр. Киэн туттар биир дойдулаахпыт — Ольга Петровна Иванова-Сидоркевич үтүө холобура кэнчээри ыччаты — дойдуну, айылҕаны, Амма өрүспүтүн — таптыырга, харыстыырга кынаттыы турдун.