Ааспыт нэдиэлэҕэ Чурапчы улууһун Төлөй-Дириҥэ нэһилиэгэр “Туойдьут Төлөйдөр” бүтүн Арас... — 18 августа 2026 г. в 02:28:19.715
Ааспыт нэдиэлэҕэ Чурапчы улууһун Төлөй-Дириҥэ нэһилиэгэр “Туойдьут Төлөйдөр” бүтүн Арассыыйа үрдүнэн ыытыллар I бэстибээл бэрт интэриэһинэй, киэҥ программалаах ыытылынна. Ол курдук, умнуллубут төрүт дьарыгы сөргүтэн сири хаһан, уот уматан туой иһиттэри буһардылар, бэстибээл үөрүүлээх аһыллыытыгар “Олох үс кэрчигэ” театрализованнай дьүһүйүүнү көрдөрдүлэр, Андрей Андреевич Саввин “Пища у якутов до развития земледелия” кинигэтинэн астаммыт аһы туой иһиттэргэ буһаран, кутан амсаттылар, туой оҥоһуктары көрүү-конкурс, А.А. Саввин “Гончарное ремесло якутов” кинигэтинэн туой оҥоһугу тута оҥорууга күрэх, маастар-кылаастар, оҕолорго научнай-практическай конференция, “Саха туой оҥоһугун инникитэ” кутаа уот тула аһаҕас кэпсэтии буолла. Бэстибээли ыыталларыгар Төлөй-Дириҥэ нэһилиэк НКО-та “Президентский фонд культурных инициатив” Россия граныгар бырайыак суруйан 1000000 солкуобайдаах суумманы ылбыттар, бырайыак ааптара Евдокия Аржакова. Бу бэстибээлгэ Горнай улууһуттан " КҮБЭЙЭ" туой устуудьуйатыгар дьарыктанар 9 киһи кыттыыны ыллылар. 🌿Майаана Моруот А.А. Саввин “Гончарное ремесло якутов” кинигэтинэн туой оҥоһугу тута оҥорууга " Көһүйэ" оҥоһугунан " Мастер и материал" анал ааты ылла. 🌿 «Ынах сүөһү – саха тыына” керамическай скульптураны оҥоруу көрүҥэр 6 кылаас үөрэнээччитэ Милена Никифорова "Магия глины" анал аатынан, онтон Мичийэ Попова " Особое видение мастера" анал аатынан хайҕаннылар. 🌿 Милена Никифорова « Лошадки» үлэтэ “Саха Дьөһөгөй таҥаралаах” керамическай скульптураны оҥоруу көрүҥэр “Магия глины" анал ааты ылла. Онон ситиһии сиэттиһэн, инникибитигэр эрэллэнэн, сүөм үрдээн кэллибит. Бу көрүҥҥэ улууспутугар дьарыктанар дьон өссө элбиэн баҕарабыт.