Сэмэн уонна Соппуруон Даниловтар ааттарынан Духуобунас киинэ - Олоҥхо дьиэтэ иккис сылб... — 26 августа 2026 г. в 06:47:43.894
Сэмэн уонна Соппуруон Даниловтар ааттарынан Духуобунас киинэ - Олоҥхо дьиэтэ иккис сылбытын Мытаах нэһилиэгэ тыа сирин түөлбэтин "Эбэ" диэн кэрэ учаастагар оҕону сахалыы эйгэҕэ иитэр "Олоҥхо кэскиллэрэ" диэн фольклорнай лааҕырбытын үлэлэтэн быйылгы сезоммутун түмүктээтибит. Лааҕыр атырдьах ыйын 4 күнүттэн 22 күнүгэр диэри үлэтин ыытта. Бу кылгас кэм иһигэр оҕолор олоҥхоҕо, тойукка, үгэ ааҕарга, оһуохай араас көрүҥнэригэр, сиэр - майгы иитиитигэр, хомуска тарда үөрэнэн элбэх билиини ыллылар, ырыа - тойук үөрэттилэр. Лааҕыр сүрүн сыалынан олоҥхону үөрэтии буолар. Ол курдук Бүлүү улууһун олоҥхоһута Василий Осипович Каратаев - Харатай Баһылай "Оҕо тулаайах" олоҥхотун былырыын куукуланан көрдөрбүт эбит буоллахтарына быйыл оҕолор бөлөҕүнэн толордулар. Бу толоруу олоҥхоһут 100 сааһыгар ананна. Оҕолор олоҥхону олус чэпчэкитик ылынан, тылын - өһүн сөбүлээн олус сөбүлээн толордулар. Инникитин бу олоҥхо сыанаҕа турарыгар үлэлэһиэхпит. Иллэҥ кэмнэригэр оҕолорго саха төрүт култууратын, үгэстэрин билиһиннэрэн араас хабааннаах маастар кылаастар ыытылыннылар. Горнай улууһун норуотун маастара Надежда Семеновна Павлова кыргыттарга сиэл хатыытын кистэлэҥин үөрэттэ. Хас биирдии кыыс оҕо бэйэтэ хаппыт ситииитин илдьэ барда. "Күбэйэ" туой устуудьуйатын салайааччыта Даайа Моруот Хонооһой кыыһа дьиэни ыраастыыр аналлаах хомпор иһит оҥоттордо. Чера Ивановна айаҥҥа илдьэ сылдьарга аналлаах шопперга сахалыы элеменнары түһэрэн уруһуйдатта. Оҕолор дьарыктаналларын таһынан "Чемезовтар" бааһынай хаһаайыстыбалара тутар туристическай базаларыгар күн ахсын 25 ньирэйи этэрээттэргэ арахсан солбуһа сылдьан аһатан көмөлөстүлэр. Оҕолор күҥҥэ 5-тэ иҥэмтиэлээх аһы аһааннар эт - сиин өттүнэн чэбдигирдилэр. Улуу суруйааччыларбыт олорон ааспыт "Бор" алаастарыгар үгэс быһыытынан иккис сылбытын атах сыгынньах хааман күүс - уох иҥэриннибит уонна айылҕаҕа сынньанан утуйан ыллылар. Атырдьах ыйын 19 күнүгэр Дьокуускай куоракка үөрэх үлэһиттэрин сүбэ мунньаҕын чэрчитинэн, өрөспүүбүлүкэтээҕи лааҕырдар икки ардыларыгар ыытыллыбыт "Единство культур - богатство России" күрэххэ биһиги лааҕырбыт Гран - при үрдүк аатын ылла. Ону тэҥэ өрөспүүбүлүкэтээҕи "Лучшие практики детского отдыха" быыстапкаҕа 1 миэстэни ылары ситистибит. Оҕолорбутугар "Сосновой борга" сынньанар босхо путевка туттардылар уонна сертификаттарынан наҕараадаланныбыт. Атырдьах йын 22 күнүгэр төрөппүттэрбит, улууспут салайааччыларын иннигэр үлэбит түмүгүн отчуоттаан көрдөрдүбүт. Лааҕыр үүнэр - сайдар саҕахтарын, инники былааннарын эһиилги сылга үлэлииргэ торумнаатыбыт. Өрөспүүбүлүкэ араас муннуктарыттан саха төрүт култууратын өрө тутар, сайдыан, олоҥхону дириҥэтэн үөрэтиэн баҕалаах оҕолору эһиилги сезоммутугар күүтэбит. Түгэнинэн туһанан иккис сылларын оҕолору кытта үлэлиир коллегаларбар С. Данилов аатынан Бэрдьигэстээх орто оскуолатын эбии үөрэхтээһин педагогар Туйгууна Ивановна Терентьеваҕа, Мытаах нэһилиэгин библиотекатын сэбиэдиссэйигэр Айталина Петровна Спиридоноваҕа, "Колокольчик" оҕо уһуйаанын иитээччитигэр Саргылана Владимировна Егороваҕа, минньигэс астаах поварбытыгар улахан махталбын тиэрдэбин. Сэмэн уонна Соппуруон Даниловтар ааттарынан Духуобунас киинин - Олоҥхо дьиэтин уус - уран салайааччыта А. Васильева