Балаҕан ыйын 5 чыыһылатыгар, чахчы да Бэрдьигэстээх төрүттэммит күнүгэр, аан айылҕабыт ... — 8 сентября 2026 г. в 03:21:19.276
Балаҕан ыйын 5 чыыһылатыгар, чахчы да Бэрдьигэстээх төрүттэммит күнүгэр, аан айылҕабыт маанылаан күммүт туран биэрдэ. Сарсыардаттан эрдэ туран дьон бары санаалара өрө көтөҕүллэн бу үтүөкэн күнү бэрт тэрээһиннээхтик атаардылар. "Тиһилик" түмсүү иһинэн үлэлиир "Күбэйэ" туой устуудьуйатын Далбар Хотуттара туойунан оҥоһуллан тахсыбыт күөс көһүйэлэргэ күөс буһаран, ас астаан сүүрүүгэ кытта кэлбит спортсменнары, сүүрүктэри, нэһилиэк олохтоохторун, ыалдьыттарын амтаннаах аһынан күндүлээтилэр. Манна аар тайҕа мааанылаах кыыла тайах этэ, эмис байтаһын ынах минэ, собо минэ, убаһа сыалаах этэ, ыһаарыламмыт собо, саха маанылаах аһа саламаат, өбүгэлэрбит төрүт астара тар, тар хааһыта, тардаах лэппиэскэ, айыылар астара алаадьы, кус, хаас бүтэйдии буһарыллыбт эттэрэ, ис минэ, эмис биэ сыата, куобах сэлиэйдээх, үөрэ оттоох минэ, ыһаарыламмыт сордоҥ, быыппах, алаас отуттан оҥоһуллубут амтаннаах чэйдэрэ. Кэлбит эрэ ыалдьыт бука бары сөҕөн, амтаннаах аһы аһаан астынан, махтанан бардылар. Кыргыттар дьон анаан ылан аһыырыгар кыракый кытыйа оҕотун оҥорон атыылаан бэйэлэрэ да астыннылар дьону да үөртүлэр. "Күбэйэ" туой устуудьуйатын талааннаах тарбахтаах Далбардара, салайааччы Даайа Моруот Хонооһой кыыһа, Нина Саввина, Оксана Сергеева, Альбина Тарасова, Анна Барашкова, Софья Андреева, Наталья Парфенова, Альбина Михайлова, Сайдыына Нарыйаана уус кыыһа, кырачаан күөсчүппүт Милена Никифорова инники үлэ былаанын торумнаан, улууспут 100 сааһын көрсө саҥа саҕахтары саҕан үлэ күөстүү оргуйан саҕаланна. Ол курдук кыһын устата үлэлиир туойдарын булан "Күбэйэлэр" үлэлииргэ бэлэмнэр. А. Васильева, Семен уонна Софрон Даниловтар ааттарынан Духуобунас киинин уус - уран салайааччыта.