Дьокуускай куоракка аан бастыкытын үс күннээх I Өрөспүүбүлүкэтээҕи Олоҥхоһуттар форумна...
Дьокуускай куоракка аан бастыкытын үс күннээх I Өрөспүүбүлүкэтээҕи Олоҥхоһуттар форумнара "Ил эйгэ" дьиэ кэргэн комплексыгар ыытылынна. Горнай улууһуттан тумус туттар киһибит, Ил Дархан стипендиата, олоҥхоһут Дария Егоровна Алексеева, Олоҥхо дьиэтин уус уран салайааччыта Анастасия Васильева, исписэлиис Елена Анатольевна Леонтьева кыттыыны ыллылар. Тэрээһини Мэҥэ - Хаҥалас улууһуттан олоҥхоһут, Кыргыстаан өрөспүүбүлүкэтигэр VI Аан дойдутааҕы "Игры кочевников" күрэх иһинэн тэриллэн ыытыллыбыт "Сказание кочевников - Наследие кочевников" норуоттар эпостарын толорооччуларын икки ардыгар ыытыллыбыт күрэх III Үрдэл кыайыылааҕа Виталий Никифоров сахалыы ырыанан арыйда. 150 киһи сайаапкаламмытыттан форумҥа 115 киһи кыттыыны ылла. Форумҥа бас - көс салайааччыларбыт СӨ Бырабыытылыстыбатын бэрэссэдээтэлин солбуйааччы Сергей Васильевич Местников, СӨ Ил Дарханын иһинэн үлэлиир Олоҥхо национальнай кэмитиэтин бэрэссэдээтэлэ Александр Николаевич Жирков, СӨ култуураҕа уонна Духуобунай сайдыыга миниистирэ Афанасий Иванович Ноев, Өрөспүүбүлүкэтээҕи норуот айымньытын дьиэтин директора Иван Федорович Иванов кыттыыны ыллылар. Сүрүн тэрийээччилэр Өрөспүүбүлүкэтээҕи Олоҥхо Ассоциациятын общественнай тэрилтэ салайааччылара Февронья Васильевна Шишигина, Елена Николаевна Протодьяконова, Зоя Григорьевна Сысолятина буолаллар. Үс күн устата тэрээһиҥҥэ Олоҥхо эйгэтин тула барар үлэлэр, билиҥҥи кэмҥэ олоҥхолооһун үгэһин харыстааһын, тэнитии, санаа атастаһар аһаҕас кэпсэтиилэр, фольклор тула ыытыллар үлэ хайысхата, уһуйааччылар түһүлгэлэрэ, оҕо сайыҥҥы лааҕырын тула кэпсэтиилэр буоллулар. Тэрээһин кэмигэр "Саха Өрөспүүбүлүкэтин олоҥхоһуттара уонна олоҥхону толорооччулара" диэн биир кэлим реестры таҥар соруктаах анкеталааһын иккис түһүмэҕэ, олоҥхоһуттары видеоҕа устуу, хаартыскаҕа түһэрии, үлэ опытын иһитиннэрии ыытылынна. Аан бастакытын Ил Дархан бирииһигэр ыытыллар өрөспүүбүлүкэтээҕи олоҥхону олоҕурбут ньыманан толорууга күөн - күрэс иккис түһүмэҕэ үс түһүлгэнэн ыытылынна. Манна 4-түү чаас устата олоҥхолуур кыттааччылар: 1. Шамаева Сайаана Николаевна (Бүлүү), Степанова Аксинья Николаевна (Мэҥэ - Хаҥалас), Григорьева Маргарита Егоровна (Бүлүү), Григорьев Николай Никитич (Чурапчы), Николаева Айталина Константиновна (Муома), Платонова Любовь Иннокентьевна (Дьокуускай), Христофоров Анатолий Николаевич (Чурапчы), Алексеева Анастасия Васильевна (Чурапчы), Маркова Елена Константиновна (Нам) улууһуттан кыттыыны ыллылар. Олоҥхо күрэҕин үһүс түһүмэҕэ 8 чаастаах олоҥхону ааҕыы аны күһүн Олоҥхо декадатын чэрчитинэн улуустарынан ыытыллара сабаҕаланар. Горнай улууһун олоҥхоһуттарыгар Павлов Василий Николаевичка, Алексеева Дария Егоровнаҕа үбүлүөйдээх саастарынан тэрийээччилэр ааттарыттан махтал суруктар, өйдөбүнньүк бэлэхтэр ону тэҥэ Дария Егоровнаҕа Өрөспүүбүлүкэтээҕи Олоҥхо Ассоциациятын аатыттан "За вклад в сохранении и популяризации якутского героического эпоса Олонхо" түөскэ кэтиллэр анал бэлиэтэ туттарылынна. Горнай улууһун Олоҥхо дьиэтин үлэтин уопутун иһитиннэрии төгүрүк остуолга ыытылынна. Кэпсэтиигэ, санаа атастаһыытыгар оҕо сайыҥҥы фольклорнай лааҕырын үлэтин, уопсай үлэ хаамыытын билиһиннэрдибит. Элбэх кыттааччы санаа эппитин түмүгэр үгүс уһуйааччылар оҕо сайыҥҥы фольклорнай лааҕырын сөргүтүүгэ, үлэлэтэргэ этиилэри киллэрдилэр. Онон бара турар үлэ хайысхатын тутуһан сайыҥҥы лааҕырбыт төгүрүк сыл үлэлииригэр сорук туруорабыт. Инникитин бу маннык тэрээһиннэр салгыы ыытылла туралларыгар баҕаран туран салайааччыларбытыгар махталбытын биллэрэбит.