МБУ "Центр культурного и спортивного развития СП "Таттинский наслег"
Спорт · 7 апреля 2026 г.
ОЛОҤХО ОҺУОРДААХ “УДЬУРҔАЙ – ТААТТА” ТЭРИЛЛИБИТЭ 15 СЫЛА — 7 апреля 2026 г. в 07:07:12.967
ОЛОҤХО ОҺУОРДААХ “УДЬУРҔАЙ – ТААТТА” ТЭРИЛЛИБИТЭ 15 СЫЛА Ытык Күөл “Сарыал” култуура киинигэр олоҥхо умсулҕаннаах эйгэтин төрүттээбит, өрөспүүбүлүкэҕэ киэҥник аатын ааттаппыт “Удьурҕай – Таатта” Таатта нэһилиэгин олоҥхо толорооччуларын этно-бөлөҕө тэриллибитэ 15 сыллаах айымньылаах үлэтин бэлиэтиир дьоро күн буолан ааста. Бөлөх лоп курдук 15 сыл аннараа улаҕатыгар 2011 сыллаахха Раиса Семеновна Маркова салайыытынан тэриллибитэ. Раиса Семеновна “Айар-тутар, кэпсиир-ипсиир аартык” бырайыак ааптара, Ийэ олоҥхоһут П.Е. Решетников – Көһөҥө Бүөтүр стипендиата, олоҥхоһут Иван Винокуров – Табаахырап аатынан анал аат хаһаайына, 2025 сылга олоҥхо эйгэтин бастыҥынан ааттанан Ил Дархан стипендиатынан ааттаммыта. Бөлөххө олоҥхо дириҥ өйдөбүлүн ыччакка тиэрдэр, түөлбэ олоҥхотун тарҕатар биир эйгэлээх талааннаах дьон түмсүбүтэ. Улуу убайбыт Былатыан Ойуунускай “Дьулуруйар Ньургун Боотур” олоҥхотун ааҕыыттан кынаттанан бөлөх айымньылаах үлэтэ саҕаламмыта. Салайааччы Раиса Семеновна ыллыыр-туойар ньымалары таба туһанан сатабыллаахтык дьарыктары саҕалаабыта. Бу сыл “Уруйдан, улуу Олоҥхобут” өрөспүүбүлүкэтээҕи фестиваль-күрэскэ 2-с степеннээх лауреат аатын аан маҥнай чиэстээхтик сүкпүттэрэ, ол кэннэ бу сыллар тухары улуус, өрөспүүбүлүкэ араас таһымнаах фестивалларыгар, күрэстэригэр кыайыы көтөллөнөн төрөөбүт Таатталарын, Сахабыт Сирин аатын аар-саарга ааттаппыттара. Бөлөхтөн куорсун анньынан олоҥхону биирдиилээн толорооччулар үүнэн-сайдан тахсыбыттара. Ол курдук “Удьурҕай – Таатта” бастакы бөлөҕүн кыттыылаахтара А.Н. Николаев, Л.К. Цой, Р.Е. Докторова, Христофоров К.И., Н.Р. Дьячковскай ааттарын киэн тутта ааттыыбыт. Билигин бөлөҕү “Сарыал” култуура киинин буҕаалтыра, улуустааҕы, өрөспүүбүлүкэтээҕи көрүүлэр анал ааттарын хаһаайына Мария Васильевна Тарабукина салайар. Манна биир эйгэлээх 11 айар куттаах, талааннаах дьоммут дьарыктаналлар. Дьоро күн “Удьурҕай-Таатта” кыттыылаахтара Петр Егорович Решетников – Көһөҥө Бүөтүр “Уордайа Хаан Бухатыыр” олоҥхотун иммерсивнай туруоруутун көрдөрдүлэр. Мустубут дьон олоҥхо тыыннаах толоруутун истэн, дьоруойдарын илэ бэйэлэрин көрөн, олоҥхо маанылаах аһын аһаан, боҕуруоскай отунан ыраастанан илэ чахчы олоҥхо дойдутугар сылдьыбыттыы сананнылар. Дьоро күн буруйдаахтарын улуус баһылыгын солбуйааччы Н.Н. Жерготов, Таатта нэһилиэгин дьаһалтатыттан Т.Ф. Куприянова, улуустааҕы норуот айымньытын дьиэтин директоры солбуйааччы И.Н. Беляев, "Сарыал" култуура киинин директоры солбуйааччы М.Г. Сунхалырова эҕэрдэлээтилэр. Олоҥхо киэргэллээх кэпсээнин көрөөччү сэргэх кулгааҕар тиэрдэр, тарҕатар, барҕардар үрдүкү аналларын толоро сылдьар “Удьурҕай-Таатта” бөлөх кыттыылаахтарыгар олоҥхолуу омуннаах аар саарга аатырар ситиһиилэри, тус бэйэлэригэр уу нуурал, байылыат олоҕу, орто дойду оҥкулугар ил-эйэ сатыылыырыгар!