«Илгэ ардаҕа сибэккини үүннэрэр» диэн этиинэн салайтаран, ардаҕы аахсыбакка, мөлтөх суо... — 18 июня 2026 г. в 00:51:48.654
«Илгэ ардаҕа сибэккини үүннэрэр» диэн этиинэн салайтаран, ардаҕы аахсыбакка, мөлтөх суолтан толлубакка эбии үөрэхтээһин педагогтарын II өрөспүүбүлүкэтээҕи форум кэрэ көстүүлээх Мындаҕайы сиригэр-уотугар икки күн, бэс ыйын 10-11 күннэригэр буолан ааста. Бу форум аан бастакытын Саха өрөспүүбүлүкэтин үөрэххэ министиэристибэтэ уонна “Юные якутяне” өрөспүүбүлүкэтээҕи ресурснай киин сүрүннээһиннэринэн 2023 сыллаахха Үөһээ Бүлүүгэ ыытыллыбыта. Быйылгы иккис форум Чурапчы улууһугар ыытыллан, сүрүн үлэтин Чурапчытааҕы «Радость» оҕо дьоҕурун сайыннарар киин коллектива, салайааччы Ирина Семеновна Сергеева моой арҕас ылынан, сыл устата бэлэмнэнэн, үрдүк таһымҥа өрө күүрүүлээхтик иилээн-саҕалаан ыыттылар. Форумҥа барыта өрөспүүбүлүкэ улуустарыттан, куораттарыттан 250 эбии үөрэхтээһин педагогтара кыттыыны ылла. Икки күн устата специалистар аныгы үөрэх технологияларын киллэриини, искусственнай интеллекты туһаныыны, оҕо-ыччат туризмын сайыннарыыны, гражданскай-патриотическай иитиини уонна уопсай уонна эбии үөрэхтээһини интеграциялааһыны дьүүллэстилэр. Форум үлэтигэр Томпо, Чурапчы, Мэҥэ-Хаҥалас, Ньурба, Үөһээ бүлүү, Хаҥалас, Уус-Алдан уонна Бүлүү оройуоннарын, ону таһынан Дьокуускай куорат делегациялара кытыннылар. Икки күн устата үөрэтэр семинардар, методическай марафоннар, дискуссионнай площадкалар уонна квалификацияны үрдэтэр куурустар ыытылыннылар. Бырайыактыыр үлэҕэ, робототехникаҕа, оҕо инженернэй толкуйун сайыннарыыга, ураты үөрэххэ наадыйар оҕолору сайыннарар үлэҕэ онтон да атын тирээн турар хайысхаларга тутаах экспертэртэн маастар-кылаастары ыыттылар. Форум чэрчитинэн «Сыл Методиһа» уонна «ПрофГид‑2026» республикатааҕы куонкурустар ыытылыннылар, манна кыттааччылар үөрэх процеһын тэрийиигэ бастыҥ практикалары уонна аныгы ньымалары көрдөрдүлэр. Маны сэргэ педагогтар декоративнай-прикладной айымньыларын өрөспүүбүлүкэтээҕи «Уран уустар түһүлгэ» быыстапкалара уонна эдэр натуралистар станцияларын быыстапката киэҥ сэҥээриини ылла. Форум кыттыылааҕа, Саха өрөспүүбүлүкэтин миниистирэ Н.А. Соколова бэлиэтээбитинэн, форум профессиональнай үүнүүгэ, саҥа сыалы-соругу туруорууга уонна республика оҕолорун дьүөрэлээхтик сайыннарыыга усулуобуйаны тэрийиигэ улахан суолталаах площадка буолар. Форум ыытыллара эбии үөрэх хаачыстыбатын үрдэтиигэ, аныгы үөрэх практикаларын олоххо киллэриигэ Уонна Саха сирин араас оройуоннарыттан педагогтар икки ардыларыгар идэлээх сибээһи бөҕөргөтүүгэ көмөлөһөр.