Бүгүн от ыйын 30 күнүгэр саха биллиилээх суруйааччыта — 30 июля 2026 г. в 13:44:06.520
Бүгүн от ыйын 30 күнүгэр саха биллиилээх суруйааччыта Афанасий Игнатьевич Федоров төрөөбүтэ 100 сыла бэлиэтэнэр күнүгэр суруйааччы «Олох долгуннара» романынан уонна Ороһу 8 кылаастаах оскуолатын учуутала Иван Максимович Иванов үөрэнээччилэрин кытары 1966 сыллаахха оҥорбут «По родному краю" альбомунан айан күнүн Ороһу норуот педагогикатын К.С. Чиряев аатынан кииниттэн Федора Алексеевна Афанасий Федоров туһунан ахтыытыттан уонна хас биирдии айаҥҥа кэлбит дьон бэйэлэрин тус сыалларын, соруктарын туһунан санааларын атастаһыыттан олус интириэһинэйдик саҕаланан 7 массыынанан айаҥҥа турунан хас биирдии айаҥҥа анаммыт маршруттарынан айылҕа анаабыт сайыҥҥы куйаас күнүгэр күөҕүнэн, сибэккинэн симэммит алаастарынан бииртэн биир тохтобулларга сылдьан, ол эрэ тохтобулга аналлаах сэргэх кэпсээннэри, быыһыгар "Олох долгуннара" кинигэҕэ суруллубут быһа тардыылары ааҕыыны истэн, Харчымахха сорохтор үрэҕи кэһэн, сорохтор тыынан туораан Афанасий Федоров төрүттэрин Ытык сирэ-уота баар сиригэр беседка оҥорбуттарыгар тиийэн салгыы суруйааччы олоҕун, аймахтарын, айымньытын тула кэпсэтии буолла. Ону таһынан Иван Максимович 1966 сыллаахха оҕолору туристата сылдьан "По родному краю" альбомун уонна эһээтин туһунан сиэнэ Мичилийэ Святославовна кэпсээтэ уонна хас биирдии айанньыкка өйдөбүнньүк буоллун диэн кинигэ бэлиэтиир (онтукатыгар биир өттүгэр ити альбомҥа киирбит хаартыскалартан, Республикаҕа туризмҥа бара сылдьыбыт оҕолор хаартыскалара, иккис өттүгэр Афанасий Федоров биллэр айымньыларын ааттара) уонна төлөпүөҥҥэ стикер бэлэхтээтэ. Оруобуна эбиэт кэмигэр тиийбит буолан онно олорон аһаатыбыт. Айаммытын түмүктүүр тохтобулбут Тамалакааҥҥа Афанасий Федоров олоро сылдьыбыт дьиэтин аттыгар хаартыскаҕа түһэн баран, оскуола тиэргэнигэр өйдөбүнньүк пааматынньыгар сибэкки ууран баран библиотекаҕа киирэн Ираида Михайловна Афанасий Федоровы аан маҥнай 1957 сыллаахха көрбүтүн туһунан ахтыытын иһиттибит, кини айымньыларыгар сүгүрүйэрин, олох сахалыы ыраастык төрөөбүт дойдутун, айылҕатын хоһуйарын сөбүлээбитин уонна сахалыы ааҕаммын дьоҥҥо пропагандалыырым диэтэ. Бу айантан олус элбэҕи биллим, истибэтэхпин иһиттим, оҕо сылдьан туристаабыт сирдэрбин көрөн биир сүөм үрдээбит саҕа сананным. Бу тэрээһини иилээн-саҕалаан ыыппыт Сардаана Николаевнаҕа, Галина Васильевнаҕа, массыынанан илдьэ сылдьыбыт Егор Ивановичка, бары айаҥҥа сылдьыбыт аргыстарбар барҕа махтал. Дьоллоох, доруобай буолуҥ, өрүү саҥаны билэргэ дьулуһуҥ! Ильина Елена Сергеевна, Ороһу орто оскуолатын ветеран учуутала.