“Сааскы тэтим” — 5 марта 2026 г. в 11:35:14.802

“Сааскы тэтим” Олунньу 28 күнүгэр П.П.Колодезников аатынан Мэҥэ Алданнааҕы оҕо искусство оскуолата уонна Н.И.Колодезников аатынан Мэҥэ Алданнааҕы ол культура киинэ маннык ааттаах кэнсиэринэн Таатта улууһун Баайаҕатыгар ыалдыттаан кэллилэр. 2026 сылга музыкальнай оскуола төрүттэммитэ үбүлүөйдээх 50 сылын бэлиэтиир. Онон туох баар ыытыллар тэрээһиннэри коллектив бу бэлиэ сылга анаан ыытарга быһаарбыта. Үҥкүү кылааһын “Кэрэчээнэ” уонна олохтоох кулууп иһинэн уонча сыллааҕыта тэриллибит “Күөгэйэ” үҥкүү ансаамбыла кэнсиэр аата да этэринии олус тэтимнээхтик, эрчимнээхтик биир тыынынан толорон Баайаҕа олохтоохторун улахан махталларын ылан кэллилэр. Кэнсиэр уус уран салайааччыта уонна үҥкүүлэри туруорбут Саха Республикатын туйгуна уонна үтүөлээх үлэһитэ, “Саха республикатыгар норуот уус уран айымньытын сайдыытыгар кылаатын иһин” бэлиэ хаһаайына Елена Пантелеймоновна Аммосова төрөөбүт түөлбэтин дьонугар анабыл үҥкүүлэри бэлэхтээбитин долгуйа, астына ытыс тыаһынан көрүстүлэр. Ол курдук Баайаҕа нэһилиэгин аар саарга аатырдыбыт бары тимир уустарыгар “Хомус ырыата”, уран тарбахтаах иистэнньэҥнэргэ “ Көмүс сүүтүк ”, үрүҥ илгэни дэлэтээччилэргэ, сайылыкка тахсаааччыларга анаан “Ньургуйаана” үҥкүүлэр төрөөбүт дойдуга ахтылҕаны, тапталы көрдөрөллөр ураты сылаас тыыннаахтар, ураты кэрэ хамсаныылаахтар. Улуу Кыайыы 80 сылыгар анаммыт “Сэрии тулаайаҕа” үҥкүү көрөөччүлэри долгутта, сэрии ыар содулун көрсүбүт дьоммут ааттара хаһан да умнуллубатын туоһулаан үҥкүү умуллубат уотунан түмүктэннэ. Баян кылааһын учуутала Александр Прокопьевич Харитонов Евгений Дога вальсын, сахалыы матыыптары, театр кылааһын эдэр учуутала Анна Романовна Спиридонова фортепианоҕа Шуберт “Экспромт си бемоль мажор” толорууларын көрөөччүлэр үрдүктүк сыаналаатылар, толорор таһымнара үрдүгүн бэлиэтээн эттилэр. Культура киинин директора Елена Геннадьевна Степанова, эдэр худрук Фая ФедоровнаГотовцева уонна фортепиано кылааһын учуутала Надежда Васильевна Захарова кэрэ куоластарынан дьон дууһатын долгуттулар, дохсун ытыс тыаһынан доҕуһуолланнылар. Үҥкүүһүт оҕолор бу айаҥҥа олус эппиэтинэстээхтик бэлэмнэммиттэрэ, оскуолабыт учууталлара Александра Пантелеймоновна уонна Елена Пантелеймоновна бу концеры үөрэммит кыһалара – Баайаҕа орто оскуолалата 155 өрөгөйдөөх үбүлүөйүгэр бачыымнаан анаабыттара, үөрэппит бары учууталларыгар кэһии курдук бэлэх ууммуттара. Айан биир улахан сыалынан Баайаҕаҕа уус музейыгар экскурсия, музыкальнай оскуоланы көрүү буолбута. Экскурсовод, ветеран учуутал, Ольга Николаевна Макарова олус умсугутуулаах кэпсээнин истэн, сэдэх экспонаттары көрөн улахан махталбытын эттибит. Хаһан баҕарар маннык айаннар оҕоҕо стимул биэрэллэр, үөрэххэ көҕүлүүллэр, интэриэһи тардаллар Онон биһиги айаммытын өйөөбүт, бензининэн хааччыйбыт Мэҥэ Алдан нэһилиэгин олохтоох дьаһалта баһылыгар Ю.Ю.Комиссаровка, таксист Е.П.Чириковка, оскуолабыт суоппара Г.Г.Калачевка уонна саамай улахан махталбытын Хаандыгаттан анаан кэлэн спонсордаан илдьэ сылдьыбыт предприниматель Иван Юрьевич Булдаковка улахан махталбытын этэбит, кинилэргэ тус олохторугар дьолу, үлэлэригэр үрдүк ситиһиилэри баҕарабыт. . “Күөгэйэ” ансаамбыл үҥкүүһүттэрэ бары араас тэрилтэ үлэһиттэрэ үлэлэриттэн быыс булан бэлэмнэнэн, таҥас сап тиктэн оҕолорго улахан холобур буолар олус эппиэтинэстээх дьон, кинилэрэ суох нэһилиэк биир да тэрээһинэ барбат, саҥаттан саҥа үҥкүүлэринэн кэнсиэрдэри, спортивнай күрэхтэһиилэри киэргэтэллэр. Бу тэтимҥитин туппутунан сылдьыҥ, куруутун эдэрдии эрчимҥитин ыһыктыбакка уһуннук үҥкүүлүү, көтө дайа сылдьыҥ диэн баҕа санаабытын этэбит. Үҥкүү диэн олус кэрэ, кинилиин доҕордоһуҥ, кинини таптааҥ, киниэхэ сүгүрүйүҥ!