Сунтаарга үөрэх үлэһиттэрин олунньутааҕы сүбэ мунньахтара буолла
Сунтаарга үөрэх үлэһиттэрин олунньутааҕы сүбэ мунньахтара буолла 🔹️🔹️🔹️Сунтаар улууһун үөрэҕин үлэһиттэрин Олунньутааҕы сүбэ мунньаҕа «Вызовы времени: Актуальные подходы к развитию системы образования» диэн темалаах Сергей Зверев -Кыыл Уолун аатынан норуот айымньытын киинигэр ыытылынна. Бастатан туран, улуус баһылыга Анатолий Григорьев оҕолор өрөспүүбүлүкэҕэ, Арассыыйаҕа, Аан дойдуга ситиһиилэрин иһин махтанан туран, үөрэх эйгэтин үлэһиттэрин олунньутааҕы сүбэ мунньахтарынан эҕэрдэлээтэ. Маннык уустук кэмҥэ педагогтар үлэлэригэр бэриниилээхтэрин көрдөрөн, үүнэр көлүөнэҕэ хаачыстыбалаах үөрэҕи биэрэ сылдьаллара киэн туттуу буолар, диэн эттэ. Ордук оҕолору тыа хаһаайыстыбатын эйгэтигэр сыһыаран иитии табыгастааҕын уонна сайдыы тэтимигэр олорсон, цифровой технологиялары туһаныы сытыытык киириитин бэлиэтээн ааста. Манна даҕатан эттэххэ, улуус бүддьүөтүн 70 %-на үөрэх эйгэтин хабар. Ааспыт сылга 7 оскуолаҕа капитальнай өрөмүөн үлэтэ ыытылынна. Олохтоох көҕүлээһини өйүүр тосхолунан Хадаҥҥа оҕо оонньуур былаһаакката турда, Сунтаардааҕы 2-с нүөмэрдээх оскуолаҕа тир оҥоһулунна. Сүбэ мунньахха үөрэх эйгэтигэр тирээн турар кыһалҕалары, каадыр тиийбэтин, штаттары сарбыйыы, үөрэх хаачыстыбатын үрдэтии тула кэпсэттилэр, тоҕоостоох дакылааттары туруордулар. Маны тэҥэ, "Аан дойду аартыга - оскуола" диэн олус наадалаах кинигэ сүрэхтэннэ. Үөрэх систиэмэтин үлэһиттэрэ олус айымньылаахтык үлэлииллэр. Айар быыстапкаҕа уһуйааччылар уонна иитээччилэр авторскай үлэлэрэ турда. Оҕону эргиччи сайыннарар оонньуулартан саҕалаан оҥоһуу өйү сөпкө туһаныы, ойуулуктары оҥоруу курдук бырайыактары сэргии көрдүбүт.