Владивостокка «Биир ньыгыл Арассыыйа» баартыйа уокуруктааҕы форума буолан ааста — 26 мая 2026 г. в 01:55:47.604
Владивостокка «Биир ньыгыл Арассыыйа» баартыйа уокуруктааҕы форума буолан ааста Ыам ыйын 25 күнүгэр Владивосток куоракка, Уһук Илиннээҕи федеральнай университет (ДВФУ) базатыгар, «Биир ньыгыл Арассыыйа» (Единая Россия) баартыйа «Түмүк баар» («Есть результат») диэн ааттаах Уһук Илиннээҕи уокуруктааҕы форума буолан ааста. Бу суолталаах тэрээһиҥҥэ Саха сирин дьахталларын союһун бэрэстэбиитэллэрэ кыттыыны ыллылар. Форум үлэтэ хас да хайысханан ситиһиилээхтик барда. Тэрээһин чэрчитинэн эрэгийиэннэр икки ардыларынааҕы сибээһи тупсарар, уопсастыба олоҕор суолталаах боппуруостары дьүүллэһэр араас тиэмэлээх төгүрүк остуоллар тэрилиннилэр. Саха сирин делегацията бу дискуссионнай былаһааккаларга актыыбынайдык кыттан, атын регионнар уопуттарын кытта билсиһэр уонна бэйэ үлэтин хайысхаларын сырдатар кыаҕы ылла. Төгүрүк остуоллар кэмигэр дьахтар лидерствота, тыа сирин сайдыыта, социальнай өйөбүл уонна патриотическай иитии курдук актуалнай тиэмэлэр таарылыннылар. Уһук Илин эрэгийиэннэриттэн мустубут делегаттар бэйэ-бэйэлэрин кытта санаа атастаһан, инники былааннары торумнастылар. Форум үлэтин түмүктүүр пленарнай мунньахха баартыйа Генеральнай сэбиэтин сэкирэтээрэ, РФ Бырабыытылыстыбатын бэрэссэдээтэлин солбуйааччыта, Уһук Илин уокурукка Дойдубут Президенын бэрэстэбиитэлэ Юрий Трутнев кытынна. Мунньахха Уһук Илин регионнара кэлиҥҥи сылларга ситиспит ситиһиилэрэ уонна инникитин быһаарыллыахтаах сүрүн соруктар ырытылыннылар. Саха сирин дьахталларын союһун бэрэстэбиитэллэрэ бэлиэтээбиттэринэн, маннык таһымнаах уокуруктааҕы форумҥа кыттыы — эрэгийиэннэр икки ардыларыгар сомоҕолоһууну күүһүртэр, саҥа былааннары олоххо киллэрэргэ күүс-көмө буолар улахан суолталаах тэрээһин.