Горнай улууһа төрүттэммитэ 95 сылын көрсө үгүс үтүө тэрээһиннэр муус устар 15 күнүттэн ... — 23 апреля 2026 г. в 01:32:18.842
Горнай улууһа төрүттэммитэ 95 сылын көрсө үгүс үтүө тэрээһиннэр муус устар 15 күнүттэн саҕаланан муус устар 19 күнүгэр түмүктүүр тэрээһин Дьокуускай куоракка "Арчы" Духуобунай киин дьиэтигэр түмүктэннэ. Семен уонна Софрон Даниловтар ааттарынан Духуобунас киинин - Олоҥхо дьиэтэ Горнай улууһун оһуохайын Добун түһүлгэтин үрдүк таһымҥа ыыппытын кэлбит дьон бэлиэтээтилэр. Түһүлгэҕэ улууспутуттан 10 бастыҥ этээччибит түһүлгэни төрүттээтилэр. Ол курдук Бэрдьигэстээхтэн Ил Дархан стипендиата, улууска фольклору өрө тутан илдьэ сылдьан тарҕатааччы, СӨ үтүөлээх этээччитэ, СӨ култууратын туйгуна Дария Алексеева, Бүлүү бөлөх оһуокай таһаарааччыларын Дархан этээччитэ, СӨ ыччат политикатын, култууратын туйгуна, СӨ үтүөлээх этээччитэ Прокопий Федоров. Өрөспүүбүлүкэтээҕи оһуохай түһүлгэтигэр "Бастыҥ кынат" ааты ылбыт Любовь Дмитриева, Олоҥхо дьиэтин фольклор исписэлииһэ, режиссера Лилия Тарасова. Инники кэскилбит "Күн оһуохайа" күрэх финалиһа, оҕолорго ыытыллар өрөспүүбүлүкэтээҕи күрэхтэр кыайыылаахтара Эдита Антонова. Маҥаны нэһилиэгин бастыҥ оһуохайдьыта Алексей Александров, Маҥанытааҕы култуура киинин директора, чөллөркөй куоластаах, СӨ култууратын туйгуна Ульяна Суханова, Горнай улууһун өрүү ааттата сылдьар Маҥаныттан төрүттээх, СӨ үтүөлээх этээччитэ Мария Иванова Атамай нэһилиэгиттэн кэрэ куоластаах, улуустааҕы, өрөспүүбүлүкэтээҕи күрэхтэр кыайыылааҕа Анастасия Филиппова кыттыыны ыллылар. Тэрээһиҥҥэ кэлбит биир дойдулаахтарбытыгар, куорат олохтоохторугар анаан элбэх ырыа ылланна, баянынан үҥкүү ыытылынна. Дойдубут алгыстаах алаадьытынан, үрүлүйэр үрүҥ илгэ сүөгэйинэн, кыынньар утахтаах кымыһынан бар дьоммут күндүлэннэ. Тугэнинэн туһанан улууска биэ ыаһыныгар сылын аайы күүстээх үлэни ыытар, биэ кымыһынан күндүлүүр бааһынай хаһаайыстыба баһылыгар, биир дойдулаахпытыгар Валерий Иванович Федоровка махталбытын тиэрдэбит. Маҥаны нэһилиэгин бастыҥ, убаастанар Далбара, олохтоох түмэл хаһаайката Мария Ивановна Осипова олус бэртээхэй оһуохайдьыттар тустарынан үйэтитии истиэндэтин туруоран, бар дьонугар көрдөрөн, кэпсээн улахан сэҥээриини ылла. Ону тэҥэ биирдиилэн атыыһыттарбытыгар, улахан махталбытын тиэрдэбит. Бу тэрээһиммитигэр кыттыыны ылбыт А.Д. Макарова аатынан култуура уонна духуобунай сайдыы колледжын төрүт салаа устудьуоннарыгар уонна уһуйааччыларыгар Михаил Николаевич Винокуровка улахан махталбытын биллэрэбит. Дьокуускайдааҕы "Оһуохай" түмсүү салайааччыларын кытта атах тэпсэн олорон, Горнай улууһугар оһуохай тэнийэн, төрүт олохтоох оһуокайы таһаарарга үлэни ыытарга үтүө кэпсэтии таҕыста. Улуустарынан ыытыллар оһуохай түһүлгэтэ бырайыак өссө да сайдан - үүнэн кэнчээри ыччакка элбэх үтүөнү, туһаны аҕала турдун. Саргыланнын саха оһуохайа, эҥээрийдин этэр тыла.