Аҕам саастаах эйэҕэс эбэлэрбитин, эһэлэрбитин самаан сайын салаллан кэлбитинэн, өссө ... — 21 мая 2026 г. в 12:13:48.564
Аҕам саастаах эйэҕэс эбэлэрбитин, эһэлэрбитин самаан сайын салаллан кэлбитинэн, өссө биир уһун кыһын хаарын уулларан күөххэ этэҥҥэ үктэммиппитинэн эҕэрдэлээн туран, Уолбут эр хоһууттара а5ам саастаах дьоммутугар бултаабыт кустарыттан, далбар хотуттар сир аһыттан буһарбыт минньигэс барыанньаларынан кэһии илдьэн туттардыбыт.Ньукуолун күнү көрсөргө "Эйгэ" сынньанар киин алгыс тыллардаах "ЫТЫК АРЧЫ" наборун оҥорон бэлэхтээтибит. Бу наборга ыраастанарга аналлаах туос, кытыан, сиэл, боҕуруоскай уонна үөрэ ото уктубут. Кырдьаҕастарбыт барахсаттар бэлэхтэрин тутан олус үөрдүлэр долгуйдулар уонна махтаннылар. Көһүппэтэх өттүттэн бэлэх тутан кууһан, сыллаан, ытамньыйан атаардылар. Аҕам саастаах биир дойдулаахтарбыт барахсаттар этэҥҥэ эрэ сылдьыҥ, сайын устата сибиэһэй салгынынан көччүйэ тыынан, чэгиэн туруккутун ыһыктымаҥ, самаан сайын кэрэхсэллээх кэмин дьиэ кэргэҥҥитин кытта бигэ туруктаахтык сайылааҥ, Үрүҥ айыыларгыт араҥаччылыы сырыттыннар диэн алҕыыбыт! Аһымал Акцияҕа кыттыбыт эр хоһууттарбытыгар, сандалы остуол маанылаах аһынан — куһунан, көмөлөспүт дьоммутугар Николай Фомичевка, Михаил Михайловка, Павел Габышевка, Николай Степановка барҕа махтал буолуохтун. Эһигини Бар хара тыа иччитэ Баай Барыылаах тойон бары булдуттан маанылыы сырыттын. Ыҥырыыбытын ылынан, алаһа дьиэ маанылаах далбар хотуттара минньигэс барыанньаннан күндүлээбит Елизавета Мырееваҕа, Наталья Габышеваҕа, Татьяна Сектяеваҕа, Екатерина Худаеваҕа, Елена Дивдевиловаҕа махтал тылларын аныыбыт. Самаан сайын салаллан кэлэн, күөх чараҥ күлүмүрдээн, күн сылааһа илгийдин.Сайыҥҥы кэрэ кэмҥитигэр үтүөнү эрэ баҕарабыт.Үлэҕитигэр — чаҕылхай ситиһиини, дьиэ кэргэҥҥитигэр — эйэни уонна сылаас сыһыаны! Сахабыт сирин сайына ырааһынан уонна сырдыгынан сүрэххитин сылыттын, дьолунан толордун. Сайын кэлэн үөрүү-көтүү үксээтин, айылҕа кэрэтэ дууһаҕытын долгуттун! Куруук бу курдук түмсүүлээх- сомоҕолоһуулаах буоллахпытына барыта табыллара, сатанара саарбаҕа суох. "Эйгэ" сынньанар киин. 2026 с. ыам ыйа.