МБУ «Сунтарский музейный комплекс им. С.А.Зверева – Кыыл Уола»
Лайфстайл · 28 мая 2026 г.
Сүрэххэ тыыннаах сырдык өйдөбүл: "СОНОР" этэрээт Улуу Кыайыы 81 сылыгар Старай Русса си... — 28 мая 2026 г. в 08:23:36.587
Сүрэххэ тыыннаах сырдык өйдөбүл: "СОНОР" этэрээт Улуу Кыайыы 81 сылыгар Старай Русса сиригэр үлэлээтэ 🎗🎗🎗Аҕа дойду Улуу сэриитин кыргыһыыларын толоонугар охтубут буойуттар сырдык ааттарын үйэтитии хас биирдиибит ытык иэһэ. Ааспыт ыйга Сунтаар улууһун «СОНОР» көрдүүр-чинчийэр этэрээтэ Новгородскай уобаласка Старай Русса экспедициятыгар көхтөөх кыттыыны ылан, дойдуларыгар ситиһиилээхтик эргилиннилэр. Бу сырыыга улуустан 3 оҕо уонна 2 салайааччы буолан айаннаабыттара. Кинилэр икки нэдиэлэ устата Старай Русса анныгар баар «Медведино» диэн сиргэ лааҕырданан, Новгородскай уобаластааҕы «Медведь» көрдүүр этэрээтигэр кыттыһан күүстээх үлэни ыыттылар. Тулуурдаах уонна чинчийэр үлэ түмүгэр «СОНОР» этэрээт буойуттара сэрии толоонугар охтубут биир саллаат кырамтатын булан туттардылар. Көдьүүстээх экспедиция кэмигэр сунтаардар үлэнэн эрэ муҥурдамматылар. Кинилэр «Медведь» этэрээт тэриллибитэ 10 сыллаах үбүлүөйүн бэлиэтиир тэрээһиҥҥэ көхтөөх кыттыыны ыллылар. Маны тэҥэ Медведино сиригэр ыытыллыбыт яблоня маһын олордуу акциятыгар кытыннылар. Саамай долгутуулааҕа былырыын бу сиртэн булуллубут биир дойдулаахпыт, буойун Борисов Илья Емельянович сырдык аатыгар анаан именной маһы олортулар. Бу мас саллаат сырдык өйдөбүлүн уонна дойдутугар кутун-сүрүн эргиллиитин туоһута буолан силигилии үүнүөҕэ. Сунтаар улууһун баһылыга Анатолий Григорьев «СОНОР» этэрээт чилиэннэрин кытта көрүстэ. Кини ыччаты патриотическай тыыҥҥа иитиигэ уонна устуоруйаны чөлүгэр түһэриигэ сөптөөх, дириҥ ис хоһоонноох үлэни ыыта сылдьалларыгар улахан махтал тылларын эттэ, үтүө түмүктээх сырыыларынан эҕэрдэлээтэ. Саллааттар ааттара умнуллубат, кинилэр хорсун быһыылара үйэлэргэ тыыннаах! Сунтаар улууһун дьаһалтатын пресс-сулууспата: https://max.ru/id1424005501_gos/AZ5n81nvEcY