Ил Дархан А.С.Николаев атырдьах ыйын 17 күнүгэр Чурапчы улууһугар үлэ хаамыытын миэстэт... — 20 августа 2026 г. в 05:32:25.272
Ил Дархан А.С.Николаев атырдьах ыйын 17 күнүгэр Чурапчы улууһугар үлэ хаамыытын миэстэтигэр билсэр сырыытыгар тыа хаһаайыстыбатын таһынан биһиги улуу тириэньэрбит Д.П. Коркин 2028 сылга 100 сааһын туоларынан өрөспүүбүлүкэтээҕи хамыыһыйа мунньаҕын ыытта. Дмитрий Петрович Коркин Чурапчы улууһугар төрөөбүт саха норуотун чулуу уола буоларын таһынан кини Россия таһымыгар спорт сүрдээх элбэх үтүөлээх, норуоттар икки ардыларынааҕы кылаастаах маастардарын, аан дойду, ССРС уонна өрөспүүбүлүкэ чөмпүйүөннэрин иитэн таһаарбыт сахалар киэн туттар киһибит буолар. 1976 с. Монреаль куоракка ыытыллыбыт олимпиадаҕа Сойуус сборнай хамаандатыттан үс саха ыччата - Павел Пинигин кыһыл көмүс мэтээл, Роман Дмитриев үрүҥ көмүс мэтээл, Александр Иванов үрүҥ көмүс мэтээл - үһүөн мэтээл ыланнар, бүтүн ССРС-һы аар саарга аатырдыбыттара. Сахаларга олимпийскай аренаны арыйбыт киһинэн Роман Михайлович Дмитриев буолар – 1972 с. Мюнхеҥҥа олимпийскай чөмпүйүөн үрдүк аатын ылбыта. Уһулуччулаах тириэньэрбит үбүлүөйүн көрсө Ил Дархан А.С.Николаев сэтинньи 18 күнүгэр 2025 с. таһаарбыт дьаһалынан тэрийэр хамыыһыйаны бырабыыталыстыба бэрэссэдээтэлин солбуйааччы Сергей Васильевич Местников иилиир-саҕалыыр. Сүрүн толорооччунан СӨ спортка министиэристибэтэ уонна Чурапчы улууһа буолабыт. Улахан оробуочай мунньах түмүгэр А.С.Николаев чопчу сорудахтары биэрдэ. Биир саамай улахан хайысханан Чурапчыга Интэринээт Томторугар 5 тыһ. тахса квадратнай миэтэрэ иэннээх, уопсай үбүлээһинэ 1 млрд 195 мөл. солкуобайдаах, 200 миэстэлээх общежитиелаах, остолобуойдаах уонна улахан спорт саалалаах баараҕай спорткомплекс тутуллуута буолар. Ону таһынан Д.П.Коркин төрөөбүт Кытаанах нэһилиэгэр спорт саалата тутуллуохтаах. Билигин оҕолору үөрэтэ олорор оскуола өрөмүөнэ, кинигэ уонна документальнай киинэ тахсыыта, суол өрөмүөнэ, Бүтүн Арассыыйатааҕы кэмпириэнсийэлэр, Дьокуускайга Д.П. Коркин аатынан биэрэк ааттаныыта, “Триумф”-ка өрөмүөн үлэтэ, сэтинньигэ Д.П.Коркин аатынан норуоттар икки ардыларынааҕы турнир ыытыллыыта уо.д.а. курдук былааннаах үлэлэр барыахтара. 2027 с. Чурапчы колхуостарын күүс өттүнэн хоту көһөрүү 85 сылын көрсө Д.П.Коркин Аҕа дойду Улуу сэриитин кэмигэр хоту көһөрүллүү кыттыылааҕа буоларынан бу хайысхаҕа кини аатын үйэтитии үлэлэригэр Ил Дархан чопчу дьаһаллары биэрбитэ астыннарар. А.С.Николаев Чурапчы нэһилиэгэр 75 миэстэлээх Мурун Тыымпыйа түөлбэтигэр 75 миэстэлээх уһуйаан тутуллуутун хаамыытын билистэ. Тутуу 85 % бүтэн турар. Алтынньы 1 күнүгэр аһыллыыта буолуо. Бэртээхэй тутуу буолсук диэн Ил Дархан тус санаатын биллэрдэ.