АҔА ДОЙДУ УЛУУ СЭРИИТИН БОЕВОЙ РЕЛИКВИЯЛАРА ТҮМЭЛБИТИГЭР ЭКСПОНАТ БУОЛАН ТУРДУЛАР — 21 апреля 2026 г. в 04:49:15.953
АҔА ДОЙДУ УЛУУ СЭРИИТИН БОЕВОЙ РЕЛИКВИЯЛАРА ТҮМЭЛБИТИГЭР ЭКСПОНАТ БУОЛАН ТУРДУЛАР Биһиги түмэлбит мецената, биир дойдулаахпыт Филипп Иванович Бондарев көмөтүнэн саҥа экспонаттар кэллилэр. Ол курдук Мосин винтовкатын штыктарын 2, саллаат кыра пехотнай лаппаакытын 2 көрүҥнэрэ, советскай солдат каската, офицерскай фуражка, РГД 42 граната оскуолактаах рубашкалара, 85 мм. снаряд гильзата уонна оскуолага, 85 мм. миномет минатын стабилизатора, 23 мм. зенитнай пушка снарядын гильзата, 7.62 мм. винтовка, наган, 9 мм. ППШ автомат гильзалара, буулдьа тэһэ көппүт солдат кружката, ат подковата, сиэрпэ. Бу экспонаттар 1941-1944 сс. Ленинград анныгар баар Синявскай үрдэллэргэ советскай армия уонна фашистскай Германия сэриилэрин икки ардыларыгар кырыктаах, тыһыынчаннан сиэртибэлээх кыргыһыылар буолбут сирдэриттэн көрдүүр экспедициялар ( сал.Пинчук В.Э., Шулика Ю.А.,Смирнов С.Н.) булан, Ф.И. Бондарев көрдөһүүтүн ылынан биһиэхэ ыыттылар. Маннык курдук көрдүүр экспедициялар үлэлэрин түмүгүнэн сылын аайы сүүһүнэн сураҕа суох сүппүт советскай саллааттар ааттара биллэр, сиэннэригэр, аймахтарыгар тириэрдиллэр... Аҕа дойду Улуу сэриитин кэмигэр Ленинград 872 хонук фашистар төгүрүктээһиннэригэр, блокадаҕа сытан сэриилэһэн бэриммэтэҕэ. 2022 с. Санкт-Петербург куоратын суута Ленинград блокадатын – фашистскай Германия өттүттэн советскай норуоту геноцидтааһына диэн билиммитэ. Бу суукка чуолкайдаммыт даннайдарынан 1.100.000 тахса киһи хоргуйан, тоҥон, буомбалааһынтан өлбүтэ бигэргэтиллибитэ. Биһиги нэһилиэкпититтэн Егор Семенович Обутов Ленинград оборонатын кыттыылааҕа, пулеметчик, Албан аат 3 ст.орденнаах, Хорсунун иһин, Ленинграды босхолооһун иһин медаллардаах этэ. Улуу Кыайыы 81 сылын көрсө түмэлбитигэр саҥа экспозиция турда, көрөөччүлэр болҕомтолорун тардыа диэн бигэ эрэллээхпит. Кэбээйитээҕи П.Д.Степанов аатынан түмэл директора Г.К.Егоров.