"Күөгү-2026" — 3 июня 2026 г. в 21:33:59.641
"Күөгү-2026" Бэс ыйын 3 күнүгэр үгэс буолбут "Күөгү - 2026" күрэх Догдоҥо нэһилиэгэр "Дүөдэҕэ" ыытылынна. Былырыын ыытыллыбыттан кыттааччы ахсаана лаппа элбээбит. Барыта 45 киһи муһунна, дьон кэлэн бэрт сэргэх, үчүгэй тэрээһин буолла. Бу сыллата ыытыллар Галина Иннокентьевна, Виктор Петрович Черемхиннар дьиэ кэргэн күрэхтэрэ дьиэ кэргэни сомоҕолуур, иллэҥ кэмҥэ уопсай дьарыкка, булт биир көрүҥэр балыктааһыҥҥа уһуйуу, оҕону, ыччаты үөрэтиигэ-такайыыга анаммыт сыаллаах-соруктаах тэрээһин буолар. Тэрийээччилэр кэлбит дьону сылаас алаадьынан көрүстүлэр. Күрэх түмүгүнэн анал ааттар ааттаннылар, кыайыылаахтар быһаарылыннылар. Ол курдук, "Бастакы балык" анал аат хаһаайына Николай Избеков, "Саамай улахан мунду" анал аат Николай Зыков буоллулар. Оҕолорго саамай элбэх мундуну Роберт Кириллин, иккис Айтал Аргунов, үһүс Айхал Кривогорницын хаптардылар. Улахан дьоҥҥо бастакы Николай Избеков, иккис Күннэй Избекова, үһүс Саргыл Михайлов миэстэлэргэ таҕыстылар. "Аҕа саастаах балыксыт" Егор Федотов, "Саамай көрдөөх тэрээһин кыттааччыта" Константин Избеков, "Оригинальнай күөгүлээх" Людмила Слепцова, "Саамай кыра балыксыт" Гоша Федотов, "Балыксыт дьиэ кэргэн" Аргуновтар дьиэ кэргэн анал ааты ыллылар. Бу ааттаммыт дьон бары араас бириистэринэн, грамоталарынан наҕараадаланнылар. Маны таһынан, бу күрэххэ сыл аайы кыттар Ольга Федотоваҕа саамай кырачаан көрөөччүгэ Миша Михайловка анал бириистэри тэрийээччилэр ааттарыттан туттарылыннылар. Бу күн таһырдьа наһаа үчүгэй ылааҥы сылаас, ичигэс, күннээх күн туран биэрэн, дьон сибиэһэй салгыҥҥа сылдьан, көрсөн ирэ-хоро кэпсэтэн астынан, дуоһуйан тарҕастылар. Бар дьон махтала, алгыһа күүскүтүгэр күүс эптин, үйэҕитин уһаттын, саҥа ситиһиилэргэ кынаттаатын!