Вестник образования Мегино-Кангаласского улуса
Образование · 30 сентября 2026 г.
Мэҥэ Хаҥаласка бастыҥ иитээччини быһаардылар
Мэҥэ Хаҥаласка бастыҥ иитээччини быһаардылар Россияҕа үөрэх ситимигэр Оскуола иннинээҕи үөрэхтээһин, Мэҥэ Хаҥалас улууһугар оскуола иннинээҕи үөрэхтээһин 100 сылларыгар анаммыт «Идэ ситимэ-2026» диэн иитээччилэр улуустааҕы идэтийбит куонкурустара Майатааҕы «Сардаана» оҕо уһуйааныгар быйыл төрдүс сылын ыытылынна. Оҕо-аймахха олох бастакы суолун кэнчээри ыччаты кэрэҕэ-сырдыкка угуйар, уһун күн устата уһуйаан дьиэтигэр ийэни-аҕаны солбуйар иитээччи буолар. Оскуола иннинээҕи үөрэхтээһин педагогтарыгар аналлаах «Идэ ситимэ» куонкуруска быйыл 5 хамаанда ол эбэтэр 10 иитээччи кэлэн бэйэлэрин кытары ыкса алтыһаннар, уопуттарын, сатабылларын тургуттулар. «Бэйэни билиһиннэрии», «Оҕо төрөөбүт тылынан сайдар», «Мин тылым — мин баайым», «Педагогическай мастарыскыай», «Үтүө оонньуулар» курдук түһүмэхтэргэ кыттааччылар бэрт сэргэх уонна сонун дьарыктары көрдөрдүлэр. Быйылгы куонкурус уратытынан билиҥҥи кэм иитээччи билиитин, сатабылын уонна идэтин таһымын үрдэтэригэр аныгы технологиялары туһанан оҕону иитиигэ, үөрэтиигэ электроннай матырыйааллары бэлэхтээтилэр, методическай сүбэлэри биэрдилэр. «Идэ ситимэ» куонкурус кыайыылаахтарынан Нөөрүктээйиттэн «Мичээр» оҕону сайыннарар киин иитээччилэрэ Галина Матросова уонна Лия Скрыбыкина буоллулар.