🙏Хүндүлүг өгбе чогаалчывыс Чооду Күнзекович Кара-Күске чырык ортемчейден чарлып чорутк...
🙏Хүндүлүг өгбе чогаалчывыс Чооду Күнзекович Кара-Күске чырык ортемчейден чарлып чорутканын дыңнаттывыс 🙏Тыва культураның, уран чүүлдүң, тыва чогаалдың, ылаңгыя уруглар чогаалының сайзыралы дээш, бүгү чогаадыкчы амыдыралының оруун харам чокка бараалгадып чораан, сураглыг уруглар чогаалчызы, «Сылдысчыгаш» солунунуң болгаш «Улуг-Хем» сеткүүлүнүң үндезилекчилериниң бирээзи, Тыва Республиканың алдарлыг ажылдакчызы, Тываның Улустуң чогаалчызы, Тываның Журналистер эвилелиниң база чогаал талазы-биле Күрүне шаңналдарының хөй катап эдилекчизи, «Күш-ажылчы шылгарал» деп медальдың эдилекчизи, Россияның хүндүлүг донору, Кызыл хоорайның Хүндүлүг хамаатызы Чооду Күнзекович Кара-Күскениӊ чырык өртемчейден чарлып чорутканы-биле Тыва Республиканың культура яамызының мурнундан ооң чоок кижилеринге ханы кажыыдалды илередип тур бис. 🕯Ол 1936 ч. май 5-те Тес-Хем кожууннуң Самагалдайга төрүттүнген. Самагалдайның 7 чыл школазын (1954), Кызылдың көдээ ажыл-агый техникумун (агроном), күрүнениң башкы институдун (биология башкызы) болгаш Марксизм-Ленинизмниң кежээки университедин (журналист) дооскан. Ажылчын базымнарын кадарчыдан эгелээш, трактористеп, агрономнап, «Тываның аныяктары» солунга килдис эргелекчилеп, «Сылдысчыгашка» харыысалгалыг секретарь бооп, «Шын» солунга 19 чыл ажыр ажылдаан. «Улуг-Хем», «Хем-Белдири», «Эне сөзү» солуннарның редактору чораан. 1960 ч. эгелеп чогаал ажылынче кирген. Баштайгы шүлүктериниң ному «Дамды» (1969) чырыкче үнген. Ооң чогаалчы амыдыралында база бир онзагай чедиишкин 1930 чылдарның үезинде репрессияга таварышкаш, өлүрткен «Эзир-Кара» деп аъттың дугайында «Аътка тураскаал» (1995) деп төөгү-шинчилелдиг ному. Ук номну бижээн соонда, «Эзир-Кара» деп аъттың төөгүзү бүдүн Тывага тарай берген болгаш билдингир апарган. Кара-Күске Күнзековичиниң 100 ажыг шүлүктери уругларның ынак ырылары апаргылаан. «XX вектиң эң-не дээре бичии уруглар ырылары» деп даңзыже кирген болгаш чогаалчы ук мөөрейниң дипломантызы болган. Ооң адын Тываның Чогаалчылар эвилели база чаңгыс чер-чурттугларының саналы-биле Самагалдайның уруглар ном саңын мөңгежидип адаан. Хүндүлүг өгбе чогаалчывыс Чооду Күнзекович Кара-Күскениӊ чырыткылыг овур-хевири, уран-чечен уругларга чогаалдары чоннуң сагыш-сеткилинге кезээ мɵңгеде артар!