Школа директорларының болгаш класс башкыларының бирги шуулганы
Школа директорларының болгаш класс башкыларының бирги шуулганы Бо хүннерде Москва хоорайның «Россия» Национал төвүнде чурттуң школалар директорларының болгаш класс башкыларының бирги шуулганы эртип турар. Бүдүн чурттуң школаларындан барык 5 муң ажыг кордакчыларның аразындан эксперттер 300 удуртукчуну шилээн. Ниитизи-биле даштыкы чурттардан болгаш Россияның аңгы-аңгы булуңнарындан муң ажыг класс башкылары, школа директорлары шуулганда чыылган. Киржикчилерни шилиирде, эксперттер кандидаттарның арга-мергежилин, бот-онзагайын база оларның эргелеп-башкарар практиказын үнелээн. Удуртукчулар өөредиглиг, культурлуг программаларда киржип, арга-дуржулгазын солчуп, российжи школалар хөгжүлдезиниң актуалдыг айтырыгларын чугаалажып турарлар. Шуулганның байырлыг ажыдыышкынында Россияның чырыдыышкын сайыды Сергей Кравцов киржикчилерге байырны чедирген. Класс башкыларының болгаш директорларның шуулганы педагогтар-биле чурттуң өөредилге адырының келир үезин болгаш чаа шиитпирлерни үндүрер шөлчүгеш апарганын ол демдеглээн. «Бо чылдың кол темазы – «Башкыларны деткиириниң дугайында» Президентиниң 498 дугаар чарлыын күүседири. Чырыдыышкын яамызы 3 федералдыг хоойлунуң төлевилелин база башкының шынзылгазының дугайында Чазактың доктаалының төлевилелин ажылдап кылган. Педагогтар-биле кады башкының статузунуң дугайында дүрүмнү белеткеп турар бис, ону хөйнүң сайгарылгазынче үндүрер бис» - деп, чырыдыышкын сайыды чугаалаан. Тываны ук шуулганда ийи удуртукчу төлээлеп турар: Кызылдың 9 дугаар гимназиязының директору Солангы Тамчай база Кызылдың 17 дугаар школазының директорунуң хүлээлгезин күүседип турар Ольга Якушева. «Шуулганның бирги хүнүнден-ле чымыштыг ажыл-ишче шымыныгып кирдивис: чаа хоойлуларның сайгарылгазындан школаның ажыл-чорудулгазынче кылымал угаанны кииреринге чедир. Бүдүн чурттан чаңгыс аай үзел-бодалдыг коллегаларым аразында тергиин ажылчын байдалда ажылдап тур бис» - деп, Кызылдың 9 дугаар гимназиязының директору, шуулганның Тывадан төлээзи Солангы Тамчай социал четкилерде бодунуң арынында бижээн. Школа директорларының шуулганы Россияның Президентизиниң даалгазы езугаар «Аныяктар болгаш уруглар» национал төлевилелдиң иштинде чоруттунуп турарын сагындыраал. Дөзү vk.ru/wall-101509374_37172 #форумдиректоровшкол2026 #образование #нацпроекты #молодежьидети