Бүгүн сайылык күнэ. Ынах сүөһүнү иитэр дьоҥҥо сайылык күнэ олус дириҥ суолталаах. Сайыл... — 22 мая 2026 г. в 07:46:14.486
Бүгүн сайылык күнэ. Ынах сүөһүнү иитэр дьоҥҥо сайылык күнэ олус дириҥ суолталаах. Сайылык – бу өлгөм үүт, эмис эт. Маны сэргэ сири-уоту иччилээн, көрөн-истэн олоруу, оҕону-ыччаты үлэҕэ иитии, өбүгэ төрүт дьарыгар сыһыарыы. «Саха сүөһүтэ» тэрилтэ муус устар ый бүтүүтэ сайылыкка көһүүнү саҕалыыр. Биир бастакынан Амма улууһугар баар Күллэги салаата көһөр. Саха сүөһүтэ атын боруодалары кытта буккуһуо суохтаах, онон ойуччу тутуллар. Күн бүгүн кыстыкка киирбит 1290 сүөһү этэҥҥэ күөххэ үктэннэ, 300-тэн тахса ынах төрөөтө. Саха сүөһүтэ баар буолан саха киһитэ тымныыны кыайбыта. Өбүгэлэрбит аттыларыгар сүөһүлэрэ баар буолан, кыһыҥҥы тымныыларга кини тыынын сылааһын туһамматтара. Аны туран, сүөһү үүтэ, этэ эрэ буолбакка, тугун барытын туһаҕа таһаараллара – кутуругуттан саҕалаан муоһугар тиийэ. Дьон саха сүөһүтүн аналын, суолтатын өйдөөн эрэриттэн үөрэбит. Бу күннэргэ СӨ үтүөлээх артыыһа, эстрада государственнай театрын артыыһа, саха дьоно сөбүлүүр ырыаһыта Александр Дьячковский – Саарын саха ынаҕар анаммыт ырыатын бэлэхтээтэ. Сунтаар улууһун Куокуну нэһилиэгин ытык олохтооҕо Николай Меркурьев тылларыгар, мелодиятыгар «Маҥааччыгым» диэн ырыа «Куйаар» уонна «Добун» устуудьуйаҕа таҥыллыбыт. Саха омук норуотун баайыгар, саха сүөһүтүгэр, биллэр-көстөр дьон өттүттэн болҕомто ууруллара, кинилэр сыанабыллара, үлэлии-хамсыы сылдьар дьоҥҥо санааларын кынаттыыр. Биир күн өрөбүлэ суох ынах-сылгы иитиитигэр үлэлии-хамсыы сылдьар туруу үлэһит дьоммор махтанабын! Этэҥҥэ күөххэ үктэммиппитинэн! Сайылыктарга түптэ буруота унаардын, оҕо-аймах саҥата чугдаардын, үрүҥ илгэ үрүлүйэ сүүрдүн! Үүнүүлээх өҥ дьыл үүннүн! Бары үтүөнү кытта, тыа хаһаайыстыбатын миниистирэ Артем Александров