Уот куйаас аргыстаах, Аан Алахчын айыыһыттаах от ыйа үүннэ — 2 июля 2026 г. в 06:33:25.379
Уот куйаас аргыстаах, Аан Алахчын айыыһыттаах от ыйа үүннэ Тыа хаһаайыстыбатын уонна ас-үөл бэлиитикэтин министиэристибэтэ улуустар, куораттааҕы уокуруктар дьаһалталарыгар тириэрдибит былаанынан 2026 сыл сайыныгар 423,7 тыһ. туонна от (ааспыт сыллааҕы былаан 98 бырыһыаныгар тэҥ) кэбиһиллиэхтээх, 29,9 тыһ. туонна сиилэс (24 бырыһыанынан элбэх) угуллуохтаах, 14,75 тыһ. туонна сенаж (10 бырыһыанынан элбэх) сууланыахтаах. Окко былаан кыччаабыта, сүрүннээн, ынах сүөһү ахсаана аҕыйыырын, оттон сиилэһи-сенаһы элбэтии хаһаайыстыбалар үп-харчы тэбэн биэрэр үүт ыамын үрдэтэргэ суоттаналларын кытта ситимнээхтэр. Манна сыһыаран быһаардахха, хас сүөһүнү-сылгыны кыстатар чинчилээхтэрин туһунан сыыппаралары улуустар бэйэлэрэ биэрэллэр. Ол курдук, 2026 – 2027 сыллардааҕы кыстыкка өрөспүүбүлүкэ үрдүнэн 157 419 ынах сүөһү, о.и. 65 539 ынах итиэннэ 177 928 сылгы, ол эбэтэр 226 452 усулуобунай төбө аһылыгар суоттаан, 423 700 туонна от быһа охсуллуохтаах. Өрүү буоларыныы, Мэҥэ Хаҥалас отчуттарын былаана барыларыттан баһырхай: 44 369 туонна (ааспыт сайын 46 187 туонна оту кэбиспиттэрэ). Чурапчы 40 тыһ., Амма, Уус Алдан уонна Хаҥалас 31-дии тыһ., Таатта 30 310, Ньурба 29 683, Сунтаар 28 тыһ., Нам 27 533, Үөһээ Бүлүү 25 718, Бүлүү 23 574, Өлүөхүмэ 14 290, Куорунай 10 532 туонналыы от былааннаахтар. Маныаха былырыын оттообут көрдөрүүлэрин Бүлүү (22 050 т этэ), Куорунай (9 913 т этэ), Хаҥалас (29 922 т этэ) эрэ улуустара куоһарар соруктаахтар. https://ulus.media/2026/07/01/uot-kujaas-argystaah-aan-alahchyn-ajyy%D2%BByttaah-ot-yja-%D2%AF%D2%AFnne/