Галия Булатованың иҗат эшчәнлегендә сәнгать чараларының киң диапазонын, сүз байлыгын ос... — 24 июня 2026 г. в 15:41:41.962
Галия Булатованың иҗат эшчәнлегендә сәнгать чараларының киң диапазонын, сүз байлыгын оста файдалану, эмоциональлек һәм югары пафосны чынбарлык, үзен табигый тотуы белән бәйләү сәләте ачык чагыла. ✅Актриса башкарган Шәмсекамәр образы (М.Әблиевнең шул исемендәге әсәре, 1938) иң уңышлы рольләренең берсе санала. Шәмсекамәр образы үзенең ачык, лирик нечкәлеге белән татар халкының иң моңлы җырларының берсе «Зиләйлүк»кә аваздаш. Актриса талантына җырдагыча моңлылык, эчке темперамент, фикер киеренкелеге һәм тышкы бизәкләр белән мавыкмау хас. ✅Ул башкарган Инга («Профессор Мамлок», Ф.Вольф, 1935, 1941), Гаврилова («Диңгездәгеләр өчен», Б.А.Лавренев, 1946), Зөһрә, Әминә («Мулланур Вахитов», 1948; «Муса Җәлил», 1957, Н.Исәнбәт), Грета Норман («Тормыш яңадан башлана», В.Н.Собко, 1954), Туйбикова («Ут», Ш.Камал, 1954), Нәсимә («Сәүбәновлар», К.Нәҗми, 1954) образлары шундыйлардан. ✅Н.Исәнбәтнең «Зифа» пьесасы буенча куелган (1954) спектакльдәге баш героиняны — көчле ихтыярлы, максатчан, үз дәрәҗәсен яхшы белүче татар хатыны образын гәүдәләндерә, һәм шуның нәтиҗәсендә әлеге спектакль җәмәгатьчелектә киң яңгыраш таба. ✅Рәйхан һәм Гүзәл (Н.Исәнбәтнең шул исемендәге пьесалары, 1948, 1954), Зөһрә («Таң атканда», Ш.Шаһгали, 1959), Камәрия («Бертуган Таһировлар», Ф.Хөсни, 1965) һәм бигрәк тә Миңлекамал (шул исемендәге пьеса, М.Әмир, 1944) образлары татар милли драматургиясендә хатын-кызның яңа характерын тудыруы белән кызыклы. Булатованың рус һәм дөнья классиклары репертуары спектакльләрендәге бәхәссез уңышы итеп Кручинина («Гаепсездән гаеплеләр», А.Н.Островский, 1933) һәм Регана («Король Лир», У.Шекспир, 1944) образларын күрсәтергә мөмкин, алар шул заманның театр тормышында зур вакыйга булып танылалар. Башка рольләре: Глафира, Варвара, Любовь («Бүреләр һәм сарыклар», «Яшенле яңгыр», «Кичеккән мәхәббәт», А.Н.Островский), Лидия Павловна, Люба («Варварлар», «Соңгылар», М.Горький), Лаура («Таш кунак», А.С.Пушкин), Эмилия («Отелло», У.Шекспир).