Амма эбэ кытылыгар, Мээндигигэ, култуура үлэһиттэрин сэминээрдэрэ түмүктэннэ — 18 июля 2026 г. в 07:11:40.010
Амма эбэ кытылыгар, Мээндигигэ, култуура үлэһиттэрин сэминээрдэрэ түмүктэннэ Ыраахтан-чугастан кэлбит биир идэлээхтэрбит үс күн устата үлэ таһымын үрдэтэр үөрэхтэргэ, экскурсияларга, күрэхтэргэ кытыннылар. Мээндиги култуураны өрө туппут, кыһыннары-сайыннары быыстала суох тэрээһиннэри тигинэччи тэрийэн олорор нэһилиэктэртэн биирдэстэрэ буолар. «Кытыл» сайыҥҥы сынньалаҥ киинин базатыгар хас кэлбит кэлэктиип уопут ылынарын таһынан, дуоһуйа сынньанан, айылҕалыын алтыһан, астынан барда. Нэһилиэк баһылыга Илья Владимирович Семенов ыалдьыттары үс күн устата арыаллаан, бары тэрээһиннэргэ кыттан, нэһилиэгин историятын дьоҥҥо сырдатан, сэминээрбит таһымын биллэ үрдэттэ. Кини бэйэтэ бэркэ суруйар, кинигэлэрин ыалдьыттарга бэлэх уунан ыытта. Тэрээһин түмүгэр кыттааччыларга анал ааттары туттаран наҕараадалаатылар. Санатан эттэххэ, сэминээргэ Өлөөнтөн, Бүлүүттэн, Эбээн Бытантайтан, Булунтан, Өлүөхүмэттэн, Намтан, Эдьигээнтэн, Чурапчыттан, Хаҥаластан, Дьааҥыттан кэлэн кытыннылар. Бары үлэлэригэр туһалааҕы билэн-көрөн, инникитин ол уопуту туһаныахтара диэн эрэнэбин. Афанасий Ноев