Ытык киһибит Борис Федорович Неустроев - Мандар Уус бырайыагынан, норуот бүттүүн сомоҕо... — 29 августа 2026 г. в 05:58:18.411
Ытык киһибит Борис Федорович Неустроев - Мандар Уус бырайыагынан, норуот бүттүүн сомоҕо күүһүнэн, тутуутун Вячеслав Васильевич Яроев иилээн-саҕалаан, кэккэ сылларга өбүгэбит өркөн өйүн, талба талаанын, мындыр сатабылын, кэрэҕэ уран көрүүлэрин кэрэһитэ буолбут саха төрүт култууратын сүдү материальнай нэһилиэстибэтэ Моҕол Ураһа хаттаан тутуллуутун үлэтэ тигинэччи бара турар. Юрий Васильевич Яроев куонкуруска кыайан, тутуу биригээдэтэ күн бүгүн үлэлии сылдьар. Ураһа каркаһа туран, билигин таспа туоһа иилиллэ сылдьар. Өрөспүүбүлүкэбит улуустарыттан норуот маастардара, түмсүүлэр, биирдиилээн дьон уонна Баайаҕа нэһилиэгин олохтоохторун, уустарын, маастардарын күүстээх үлэлэрэ, көмөлөрө сүрүн тирэх буолла. Билигин Ураһа курдуутун тигиитигэр күүстээх үлэ бара турар. Ол курдук, Баайаҕа маастардара, түөлбэ олохтоохторо, тэрилтэлэр, биирдиилээн дьон курдууну тигэ олороллор. Бу сайын «Мандар кыһата» лааҕыр оҕолоро төрөппүттэрин, эбэлэрин кытта тиктилэр, «Айыы кыһата» оскуола эбэлэрэ тигистилэр, куораттан Варвара Тихоновна Васильева салайааччылаах «Туймаада» түмсүү бары маастардара тигэн ыыттылар. Таспа Туоска Тааттаттан Уус Таатта, Уолба, Баайаҕа нэһилиэктэрэ күүскэ үлэлээтилэр. Көнтөс тигиитигэр Таатта улууһуттан Ытык Күөл, Чөркөөх, Дэбдиргэ, Баайаҕа, Уус Алдан улууһуттан Бороҕон, Бээрийэ, Дүпсэ, Найахы нэһилиэктэрэ үлэлээтилэр. Билигин Амма Болугур нэһилиэгэ уонна Чурапчы Төлөй нэһилиэгэ көнтөс тигэ олороллор. Ону таһынан, сиэлинэн элбэх киһи көмөлөстө. Норуот бүттүүн көмөтүнэн ураһаны тутууга уопсайа 4,9 мөлүйүөн солк. харчы хомулунна. Күндү биир дойдулаахтарбытыгар, иистэнньэҥнэрбитигэр, маастардарбытыгар, уустарбытыгар, күүс-көмө буола сылдьар Сахабыт сирин олохтоохторугар дириҥ махталбын тиэрдэбин! Афанасий Ноев