Модукка — өрөспүүбүлүкэтээҕи бэтэрээннэр слеттара — 21 августа 2026 г. в 08:40:49.279
Модукка — өрөспүүбүлүкэтээҕи бэтэрээннэр слеттара Бэҕэһээ, атырдьах ыйын 20 күнүгэр, Нам улууһун Модут нэһилиэгин оҕо сынньаланар лааҕырын базатыгар «Социальнай туризм — көхтөөх уһун үйэ сыалыгар» диэн өрөспүүбүлүкэтээҕи бэтэрээннэр уонна биэнсийэлээхтэр слеттарын үөрүүлээх арыллыыта буолла. Бу тэрээһини Өрөспүүбүлүкэтээҕи уонна Нам улууһун бэтэрээннэрин сэбиэттэрэ, Нам улууһун муниципальнай оройуонун уонна Модут нэһилиэгин дьаһалталара бииргэ тэрийдилэр. Слетка Амга, Хаҥалас, Нам улуустарын, Дьокуускай куорат бэтэрээннэрин делегациялара уонна Ис дьыала уорганнарын бэтэрээннэрин хамаандата кыттар. Тэрээһин үөрүүлээх арыллыытыгар Нам улууһун баһылыгын солбуйааччы Юрий Дьяконов, Өрөспүүбүлүкэтээҕи бэтэрээннэр сэбиэттэрин бэрэссэдээтэлэ Аркадий Саввинов, улуустааҕы бэтэрээннэр сэбиэттэрин бэрэссэдээтэлэ Софья Кобякова, улуустааҕы социальнай харалта управлениетын салайааччы Людмила Петрова уонна Модут нэһилиэгин баһылыга Ефим Гоголев эҕэрдэ тыл эттилэр. Кинилэр бэтэрээннэр хамсааһыннарын сайыннарыыга сыралаах үлэлэрин иһин көхтөөх бэтэрээннэргэ, тэрилтэлэр салайааччыларыгар уонна бэтэрээннэр сэбиэттэригэр куруук күүс-көмө буолааччыларга Бочуотунай грамоталары, Махтал суруктары, сэмэй бэлэхтэри үөрүүлээх быһыыга-майгыга туттардылар. Сахалыы сиэринэн алгыс тыл этилиннэ. Программа быһыытынан, бүгүн уонна сарсын кыттыылаахтар уопсайа биэс көрүҥҥэ күрэхтэһиэхтэрэ. Ону таһынан, бэтэрээннэр улуус историятын кытта билсэн музейдарга сылдьыахтара уонна анаан тэриллибит культурнай тэрээһиннэргэ кыттыахтара.⤵️