Улуустааҕы семинар-практикумҥа эстетика-прикладной цикл учууталлара түмүстүлэр — 13 апреля 2026 г. в 01:19:14.931
Улуустааҕы семинар-практикумҥа эстетика-прикладной цикл учууталлара түмүстүлэр Муус устар 8 күнүгэр Эбээн-Бытантай национальнай улууһугар эстетика-прикладной үөрэхтээһин педагогтар идэтийбит кэпсэтиилэрин киинэ буолла. Манна оскуола бырагырааматын сүрүн уларыйыыларыгар: «Төрөөбүт дойду куттала суох буолуутун уонна көмүскэлин олохторо» (ОБЗР) диэн предмет модульларын ырытыы уонна саҥа ФГОС усулуобуйатыгар эстетика-прикладной үөрэхтээһини сайыннарыыга анаммыт киэҥ далааһыннаах семинар-практикум буолан ааста. Мунньах сүрүн сыала: үөрэхтэр методическай холбоһуктарын педагогтарын уонна ОБЗР (Олох кутталлаах буолуутун олоҕо уонна Төрөөбүт дойду көмүскэлэ) учууталларын идэлэрин таһымын үрдэтии, үөрэтии аныгы ньымаларын уонна технологияларын кытта билиһиннэрии, үөрэнээччилэри ыксаллаах быһыыга-майгыга дьайыыга көдьүүстээхтик бэлэмнииргэ саҥа киирбит уларыйыылары сырдатыы, ону таһынан оскуола оҕолорун художественнай-эстетическай иитиигэ инновационнай ньымалары киллэрии. Семинар бырагыраамата олус дириҥ ис хоһоонноох буолла. Семинар – практикум бастакы чааьын С.Н. Донской-II аатынан Үөрэҕи сайыннарыы уонна идэни үрдэтии института онлайн-блок нөҥүө олохтоото, лектор И.Ю. Тарасенко үөрэх үлэһиттэригэр бастакы көмөнү оҥоруу олохторугар билиитин-көрүүтүн саҥарта. Семинар - практикумҥа сүрүн болҕомто практикаҕа уурулунна. Саккырыыр орто оскуолатыгар Ц.Б. Гаряев, И.Н.Слепцов аатынан Кустуур орто оскуолатын ОБЗР учуутала, Г.И. Томскай А.С.Садовников аатынан Дьарҕалаах орто оскуолатын ОБЗР учуутала салайыыларынан учууталларга ОБЗР уруогар баар модульлартан саамай уустук модуллары ырыттылар, ол курдук: АК-74 автоматынан үлэлээһин уонна киһи тус бэйэтин көмүскэнэригэр араас методикалар. Тыыннаах хаалыы: аан дойдутааҕы куттал суох буолуу бэлиэлэрин уонна сигнал биэрэр сиэркилэни туһаныыны эрчиллии. Маны тэҥэ салгыы эстетика-прикладной хайысхалаах сиэксийэ үлэлээтэ. Саха Сирин бастакы президенэ Михаил Николаев «хамсаныы, уруһуй уонна музыка - оҕо айылгыта сайдар суоллара» диэн эппит тылларын тутуһан, педагогтар «Бары уруһуйдуохха» (Рисуем все) уонна «Музыка барыбытыгар» (Музыка для всех) бырайыактарга олоҕуран бэйэлэрин уопуттарыттан үллэһиннилэр. Ол чэрчитинэн оскуола фойетыгар үөрэнээччилэр, учууталлар уус-уран оҥоһуктарга үлэлэрин быыстапката ураты болҕомтону тарта. Турбут быыстапкалар үөрэхтээһиҥҥэ саҥаны киллэрии (инновация) төрүт үгэстэри кытта эҥэрдэһэн үчүгэйдик сайдарын туоһута буолла. Тэрээһин биир суолталаах чааһынан улуустааҕы методическай холбоһук үлэтин Анна Николаевна Мохчогорова сиһилии сырдатта, Саккырыыр орто оскуолатын учуутала Степанова Татьяна Николаевна өр кэмнээх үлэтин түмүктээтэ уонна кэпсэтии түмүгэр методическай холбоһук саҥа салайааччытынан Данилова Ньургуйаана Петровна, Дьарҕалаах орто оскуолатын учуутала талылынна. Семинар - практикум үөрүүлээх быһыыга-майгыга сертификаттары туттарыынан уонна уопсай хаартыскаҕа түһүүнэн түмүктэннэ. Кыттыылаахтар бэлиэтээбиттэринэн, маннык көрсүһүүлэр уопут атастаһарга эрэ буолбакка, хорсун, эппиэтинэстээх уонна бары өттүнэн сайдыылаах көлүөнэни иитэргэ биир кэлим ньымалары тобуларга кыах биэрэллэр. Улуустааҕы үөрэҕирии салаата