Алын сүһүөх кылаас учууталлара сүбэ мунньах иитинэн ыытыллыбыт семинарга кытыннылар.
Алын сүһүөх кылаас учууталлара сүбэ мунньах иитинэн ыытыллыбыт семинарга кытыннылар. Методическай холбоһук салайааччыта Луиза Егоровна Максимова улуус таһымыгар алын кылаас үөрэҕин хаачыстыбатын уонна оскуолаҕа киирии ситимнээх буолуутун (преемственность) боппуруоһун быһаарарга улахан тирэх буолар дириҥ суолталаах икки улахан тэрээһин ситиһиилээхтик ыытыллыбытын сырдатта. Ол курдук, 4-с кылааһы бүтэрээччилэр орто сүһүөххэ күүстээх математическай базалаах киирэллэрин ситиһэр сыаллаах, улуус үрдүнэн төгүл таблицатын зачет быһыытынан тутуу тэриллибитин, 1-кы кылааһы ылыахтаах учууталлар уһуйааннарга бэлэмнэнии бөлөҕүн оҕолоругар илии кыра былчыҥнарын (мелкая моторика) сайдыытын быһаарар каллиграфия ураты күрэҕин ыыппыттарын билиһиннэрдэ. Оскуола методическай холбоһуктарын салайааччыларыгар ыытыллыбыт үлэни сиһилии ырытан, быйылгы үөрэх дьылыгар былааннааһыҥҥа көхтөөхтүк кытталларыгар, интэриэһинэй этиилээх кэлэллэригэр ыҥырда. Семинар сүрүн чааһынан Үөрэҕи сайыннарар уонна идэ таһымын үрдэтэр институт оскуола ииннинээҕи, алын сүһүөх уонна инклюзивнай үөрэхтээһин кафедратын сэбиэдиссэйэ Людмила Николаевна Прокопьева «Особенности преподавания учебных предметов на уровне начального общего образования в 2026-2027 уч.г.» лекцията буолла. 4 кылаастарга бэрэбиэркэлиир үлэ уларыйыыларын уонна кыһалҕаларын сиһилии ырытта, Ордук сыыһа оҥоһуллар сорудахтарын көрдөрөн ырытыы оҥордо. Хас да сыл кэтээн көрүү түмүктэригэр олоҕуран ыарырҕатар өрүттэрин билиһиннэрдэ, үөрэнээччилэр билиилэрин итэҕэстэрин туоратыыга ньымалары көрдөрдө.Улуус учууталлара олус сэргээн иһиттилэр, махтаннылар. Алын кылаас учууталларыгар анаан ыытыллыбыт дошкольнай, начальнай, уонна инклюзивнай үөрэх кафедратын салайааччыта Прокопьева Людмила Николаевна семинарыгар кыттан саҥа билиини-көрүүнү ыллым, олус элбэххэ үөрэнним. Бу семинар инники үлэбэр туһалаах элбэх саҥа ньымалары, көрүүлэри арыйда. Семинар сыала-соруга олус чопчу уонна үлэҕэ туһалаах этэ. Биһиги алын кылаастар 4-с кылааска туттарар ВПР-быт туох уустуктааҕын, уларыйыыларын, хас эмэ сыллааҕы кэтээн көрууну,тэҥнээһини, ханнык предмеккэ, сорудахха тоҕо ыарырҕаталларыгар тиийэ, ону хайдах туоратары, араас ньымалары олус дириҥник ырытта. Людмила Николаевна олус бэлэмнээх, идэтин толору билэр киһи кэлэн бу теманы сырдаппыта олус үчүгэй. Ыйытыыларга толору хоруйдары биэрэн, биһигини истээччилэри кэпсэтиигэ көхтөөхтүк кытыннарда. Мин бу семинартан ылбыт билиибин инникитин бэйэм үлэбэр булгуччу туттуохпун баҕарабын. Бу ньымалар оҕолорго үөрэххэ интэриэһи үөскэтэргэ, билиини дириҥэтэргэ улахан көмө буолуохтара диэн эрэнэбин. Маннык семинардар биһиги, учууталлар, күн ахсын үлэбитигэр саҥаны, сайдыыны киллэрэрбитигэр көмөлөһөллөр. Бу семинары тэрийээччилэргэ уонна лекторга барҕа махталбын тиэрдэбин! Маннык үтүө тэрээһиннэр салгыы да ыытылла турдуннар, идэбитин сайыннарар, билиибитин хаҥатар маннык түгэннэр биһиэхэ олус наадалаахтар. Махтал!Федорова Айталина Александровна, С. Д. Флегонтов аатынан Хадаар орто оскуолатын алын кылаас учуутала. Быйылгы балаҕан ыйынааҕы үөрэхтээьин эйгэтин мунньаҕа "Здоровьесберегающая среда как стратегический ресурс повышения качества образования и воспитания в условиях обновленных ФГОС " диэн темаҕа буолла. Алын кылаас учууталларын семинарыгар Прокопьева Людмила Николаевна "Особенности преподавания учебных предметов на уровне начального общего образования в 2026-27 уч.г" тула төрдүс кылаастар ааспыт үөрэх дьылыгар ВПР хайдах туттарбыттарын туһунан анализтаан кэпсэтиини тэрийдэ. Оҕолор ханнык биридимиэккэ, ханнык сорудахтарга ыарырҕаппыттарыгар дириҥник тохтоон анализ онордо. Былырыыҥҥы үөрэх дьылыгар Чурапчы улууһун оскуолаларын алын кылаас оҕолоро ВПРы куһаҕана суохтук туттардылар диэн иһитиннэрдэ. Ону таһынан бу үөрэх дьылыгар сүрүн уларыйыыларга, инники соруктарга тохтоото”Брызгаева Татьяна Титовна, Соловьев орто оскуолатын учуутала.