🕊️ Чуумпу Түгэн – Чурапчы Холкуостарын Көһөрүү Кэриэһигэр 🕯️
🕊️ Чуумпу Түгэн – Чурапчы Холкуостарын Көһөрүү Кэриэһигэр 🕯️ Бүгүн, балаҕан ыйын 19 күнүгэр, Р.И. Константинов аатынан Амма орто оскуолатыгар 2-11 кылаас үөрэнээччилэригэр “Чурапчы холкуостарын көһөрүү кэриэһигэр анаммыт Чуумпу Түгэн”линейката ыытылынна. Бу күн, балаҕан ыйын 19 күнэ, Чурапчы улууһун историятыгар умнуллубат, ыар суоллаах күн. Чурапчы көһөрүүтүн алдьархайа – бу бүттүүн саха омугун ыар алдьархайа. Бу харах уулаах быһылаан историяҕа “Чурапчы алдьархайа” диэн аатынан киирбитэ. Ол курдук, 1939 сылтан турбут хас да сыллаах кураан Чурапчы улууһугар ордук суоһаабыта. Кыһын хаар түспэккэ, сайын аһыҥа ыһан сир-дойду ото-маһа үүммэккэ харанан көрбүтэ. Мантан улахан аччыктааһын тахсыбытыгар, былаас чурапчылары хоту улуустарга балыктата ыытарга диэн уһуну-киэҥи ырыппакка суһал дьаһал таһаарбыта. Чурапчы оройуонун колхуостарын хоту балык булдугар көһөрөргө күһэйии 1942 с. атырдьах ыйын 11 күнүгэр 213№-дээх уураахха баттаммыта. Чурапчы улууһуттан 41 колхуос, 5318 киһилээх 1850 хаһаайыстыбаны, төрөөбүт төрүт буордарыттан күүс өттүнэн Кэбээйи, Булун, Эдьигээн улуустарыгар ыыппыттара. Линейкаҕа оскуолабыт бары үөрэнээччилэрэ уонна учууталлара, ол кэмнээҕи ыар дьылҕаҕа сүрэхтэрэ тохтообут дьоммутун уонна олох охсуутугар бэримминэх, тулуйан олорбут аҕа көлүөнэ дьоммутун кэриэстээн, чуумпу түгэнинэн чиэстээтилэр. «Ким да умнуллубат, туох да умнуллубат!» – бу этии хас биирдии Саха киһитин өйүгэр санаатыгар үйэлэргэ хаалыахтаах. Биһиги, ыччат көлүөнэ, өбүгэлэрбит бу тургутууну хайдах ааспыттарын, кинилэр тулуурдарын уонна хорсун санааларын өрүүтүн өйдүөхпүт.