Тыа сирин кэскилин туһугар
Тыа сирин кэскилин туһугар Балаҕан ыйын 17 күнүгэр, Чурапчы улууһун профессор Г.П.Башарин аатынан Сылаҥ орто оскуолатыгар, «Кадры в АПК» федеральнай бырайыак чэрчитинэн “Птицеводство будущего: технологии и управление” хайысхалаах агротехнологическай кылаас арылынна. Үөрүүлээх тэрээһин оскуола агрохайысхатын кэпсиир быыстапкаттан саҕаланна. Быыстапка 4 хайысханы сырдатта: От чэйи оҥоруу, түргэнник ситэр көтөрү иитии, оҕолор кус иитиитин туһунан научнай-чинчийэр үлэлэрэ уонна хас биирдии кылаас агро-бизнес бырайыактара. Салгыы саҥа агрокылаас үөрэнээччилэрэ профессор Г.П.Башарин айымньылаах олоҕун, научнай үлэлэрин сүрүн санааларын арыйар, кэпсиир Кэс тылларын доргуччу ааҕан бу түгэн суолтатын өссө үрдэтиллэр. Үөрүүлээх тэрээһин кыттыылаахтарын быһа биэриинэн, СӨ тыа хаһаайыстыбатын миниистирин эбээһинэһин толорооччу Стручкова А.А. эҕэрдэлээтэ. «Оскуола үлэҕэ иитэр хайысхата профессор Г.П.Башарин Өй да, илии да үлэлэрин өркөн күн, ытык ый оҥостон сылдьыахтаахпыт. Итилэргэ икки атахпытынан чиҥник тирэниэхтээхпит уонна «имигэс промышленность» баар буолуохтаах» диэн билиҥҥи кэми өтө көрөн эппит санааларынан сирдэтинэбит. Биһиги науканы, инновацияны уонна илии үлэтин тэҥҥэ тутан үлэлииргэ кыһаллабыт, үлэбит былаана, хаамыыта оннук. Бу аҕыйах хонуктааҕыта учебно-производственнай центр-оҕону үлэҕэ үөрэтэр–уһуйар киин акылаатын түһэрдибит, көҥдөйүн таһааран эрэбит. Итиннэ оҕолор аныгы оборудованияларга үлэлии үөрэниэхтээхтэр. Онно аныгы үөрэх тэриллэринэн хааччыллыбыт агротехнологическай кылаас төһүү күүс буолуоҕа» диэн дириэктэр Сивцева Л.С. эттэ. Кини Өрөспүүбүлүкэ салалтатыгар, Үөрэх уонна наука министиэристибэтигэр, Тыа хаһаайыстыбатын министиэристибэтигэр истиҥник махтанна. С.Н.Донской аатынан Үөрэх сайдыытын уонна учууталлар идэлэрин таһымын үрдэтэр институт сүрүн преподователэ Уарова Н.В. оҕолорго туһаайан агротехкылаас инники кэскилин, тыа хаһаайыстыбата сайдыытыгар улахан суолтатын, үрдүк хаачыстыбалаах бэйэ бородууксуйатын элбэтиигэ, саҥа технологиялары баһылыырга туһуланарын бэлиэтээтэ. Үөрэнээччилэри тыа хаһаайыстыбатын идэлэрин баһылыылларыгар ыҥырда, кинилэргэ эрэнэрин биллэрдэ. Чурапчы улууһун үөрэҕин салалтатын начальнигын солбуйааччы Моисеева А.Б. ааспыт үөрэх сылын ситиһиилэрин иһитиннэрдэ. Оҕолору науканы, үөрэҕи уонна илии үлэтин тэҥинэн тутан сайдалларыгар ыҥырда. Оскуола уонна учууталлар ситиһиилэрин бэлиэтээтэ. Чурапчы улууһун тыа хаһаайыстыбатын управлениятын начальнигын солбуйаачы Толстоухов А.П. улуус администрациятын аатыттан эҕэрдэлээтэ, коллективка махтанна. Эдэр учууталлар Гладкина Ю.Ф., Монастырева А.Д. дьарык ыыттылар, үөрэнээччилэр саҥа үөрэнэр техникэни баһылаабыттарын көрдүбүт, астынныбыт. Тэрээһин кыттыылаахтара салгыы мэдиссиинэ кылааһын үөрэнээччилэрин, “Профессионалы” Бүтүн Арассыыйатааҕы чемпионат регионнааҕы түһүмэҕин кыайыылаахтарын кытта көрүстүлэр. Үөрэх управлениятын отделын начальнига Винокурова И.Г. улуус, нэһилиэк инники кэскилигэр улахан суолталаах агротехнологическай кылаас аһыллыбытынан эҕэрдэлээтэ. Саҥа саҕалааһыннарга, профильнай үөрэхтээһиҥҥэ уопуттаах, үлэһит кэллэктиипкэ эрэнэрин иһитиннэрдэ. Бу күн Чурапчы улууһун Сылаҥ нэһилиэгэр тыа сирин кэскилин быһаарар биир бэлиэ тэрээһин буолла. Сивцева Л.С., оскуола дириэктэрэ.