Киэн туттар дьоруойбут биһиги кэккэбитигэр!
Киэн туттар дьоруойбут биһиги кэккэбитигэр! Балаҕан ыйын 24 күнүгэр, Семён Андреевич Новгородов аатынан Дархан кыһатыгар история тыына илэ бэйэтинэн долгуйа уһугунна. Биһиги үөрдүбүт уонна долгуйдубут — Арассыыйа Дьоруойа, «Алеша» танк механига Филипп Евсеев ыалдьыттаабытыттан! Бу дьоһуннаах тэрээһини Чурапчы улууһун Үөрэҕириитин салалтата иилээн-саҕалаан ыытта. Курспут маннык киэҥ хабааннаах, дириҥ ис хоһоонноох патриотическай тэрээһиҥҥэ холбоспута олус үөрдэр. Көрсүһүү саҕаланыыта «Алеша» танк өстөөхтөрү утары хайдах курдук хорсуннук охсуспутун туһунан хрониканы көрөн баран, саала иһийэн чуумпурбута. 7-с кылаастар уолаттара-кыргыттара герой диэки тардыстан туралларын, кинилэр харахтарыгар баар уоту көрөммүт биһиги, курсааннар, олус астынныбыт — бу көлүөнэ дойдутун дьиҥнээхтик таптыыр, сыаналыыр! Филипп Александрович наһаа судургу, боростуой уонна ылыннарыылаах тыллаах-өстөөх эбит. Хас биирдии ыйытыыга лоп-бааччы эппиэттээтэ. Кини кэпсээниттэн өйдөөтүбүт: ✅ Хорсун быһыы диэн өлүүттэн куттаммат буолуу буолбатах, Эппиэтинэскин санааҕар даҕаны түһэрбэт буолуу. ✅ Доҕордоһуу диэн — аттыгар баар доҕоргун кытта биир тыынынан тыынар, бэйэ бэйэҕэ эрэнэр буолуу Бу көрсүһүү кэнниттэн биһиги оҕолорбут атын дьон буолан тахсалларыгар бүк эрэнэбит. Кинилэр ортолоругар инники саллааттар, учуонайдар, салайааччылар бааллар. Бүгүҥҥү күнтэн кинилэр сүрэхтэригэр өссө биир сырдык сулус умайда — Ийэ дойдуга таптал уота. Биһиги сахалар былыр-былыргыттан боотурдардаах, бухатыырдардаах омукпут. Уолан Боотур, Тыгын Дархан, Манчаары Баһылай... Оттон бүгүн кинилэр утумнарын Филипп Евсеев салгыы илдьэ сылдьар. Кини биһиги ортобутугар сылдьара — улахан дьол! Улахан махтал, Филипп Александрович! Эйиэхэ уонна бары бойобуой доҕотторгор туйгун доруобуйаны, дьолу-соргуну, эйэлээх халлааны баҕарабыт! Санааҕыт самныбатын, өрүү кыайыы аргыстастын! Махталбытын биллэрэбит Чурапчы улууһун Үөрэҕириитин салалтатыгар, бу курдук сүдү тэрээһини көҕүлээн, ыччаттарбыт духуобунай сайдалларыгар болҕомто ууран, дьиҥнээх холобурдары кытта көрүһүннэрбитигэр! Эһиги үлэҕит — норуот кэскилэ! Лидия Лукина, С.Д.Флегонтов аатынан Хадаар орто оскуолатын дириэктэри иитэр үлэҕэ солбуйааччыта #БоотурУуссыдьааннара #АлешаТанк #Патриотизм